News

పన్నూన్ హత్య కుట్ర కేసు.. అమెరికా కోర్టుకు నిఖిల్ గుప్తా క్షమాపణ లేఖ

17views

వాషింగ్టన్: ఖలిస్తానీ వేర్పాటువాది గురుపత్వంత్ సింగ్ పన్నూన్ హత్యకు కుట్ర పన్నిన కేసులో నేరాన్ని అంగీకరించిన నిఖిల్ గుప్తా అమెరికా కోర్టుకు క్షమాపణ లేఖ రాశారు. తన చర్యల పట్ల తీవ్ర పశ్చాత్తాపం వ్యక్తం చేస్తూ, గతంలోకి వెళ్లి చేసిన తప్పులను సరిదిద్దుకునే అవకాశం ఉంటే బాగుండేదని పేర్కొన్నారు. అమెరికా జిల్లా న్యాయమూర్తి విక్టర్ మారెరోకు ఈ లేఖను సమర్పించారు.

ఈ కేసులో నవంబర్ 20న నిఖిల్ గుప్తాకు శిక్ష ఖరారు కానుంది. అమెరికా ప్రాసిక్యూటర్లు ఆయనకు 293 నెలలు అంటే 24 ఏళ్లకు పైగా జైలు శిక్ష విధించాలని న్యాయస్థానాన్ని కోరారు. మరోవైపు, నిఖిల్ గుప్తా తరఫు న్యాయవాదులు 144 నెలలు అంటే 12 ఏళ్ల శిక్ష విధించాలని అభ్యర్థించారు.

2023 నాటి తప్పులను గుర్తుచేసుకుంటూ పశ్చాత్తాపం
తన లేఖలో నిఖిల్ గుప్తా 2023 నాటి పరిస్థితులను ప్రస్తావించారు. ఆ సమయంలో తాను మానసికంగా తీవ్ర గందరగోళంలో ఉన్నానని, తన జీవితాన్ని వెనక్కి తీసుకెళ్లి తప్పులను సరిదిద్దుకోవాలని ఉందని పేర్కొన్నారు. అరెస్టయిన తొలినాళ్లలో తీవ్ర మానసిక ఆందోళనకు గురయ్యానని, ఆత్మహత్య ఆలోచనలు కూడా వచ్చాయని వెల్లడించారు. తన భార్య, పిల్లలు, తల్లి, ఇతర కుటుంబ సభ్యులు ఎదుర్కొన్న బాధ తనను తీవ్రంగా కలచివేసిందని తెలిపారు. తన రెండు పెంపుడు పిల్లులు కూడా తనకు గుర్తొచ్చాయని లేఖలో భావోద్వేగంగా పేర్కొన్నారు.

అరెస్టు తర్వాత తాను క్షేమంగా ఉన్నానని కుటుంబ సభ్యులకు తెలియజేయడం, తన ఆరోగ్య పరిస్థితి గురించి వారికి సమాచారం అందించడం ప్రధాన ఆందోళనగా ఉండేదని వివరించారు. అయితే చట్టపరమైన ఆంక్షల కారణంగా కొన్ని వారాలపాటు కుటుంబ సభ్యులతో మాట్లాడలేకపోయానని తెలిపారు.

ఏ శిక్ష విధించినా అంగీకరిస్తా!
తనపై నమోదైన కేసులో న్యాయస్థానం తీసుకునే నిర్ణయాన్ని అంగీకరిస్తానని నిఖిల్ గుప్తా పేర్కొన్నారు. తన చర్యల వల్ల కలిగిన పరిణామాలపై విచారం వ్యక్తం చేస్తూ, ఇకపై తన జీవితాన్ని సరిదిద్దుకోవాలనుకుంటున్నట్లు లేఖలో తెలిపారు.

24 ఏళ్లకు పైగా శిక్ష కోరిన ప్రాసిక్యూషన్
నిఖిల్ గుప్తాపై నమోదైన హత్యకు కిరాయి కుట్ర, హత్యకు కిరాయి ఇవ్వడం, మనీలాండరింగ్ కుట్రకు సంబంధించిన మూడు అభియోగాలను ఆయన 2026 ఫిబ్రవరిలో అంగీకరించారు.అమెరికా ప్రాసిక్యూషన్ 293 నెలల జైలు శిక్ష విధించాలని కోరగా, ఆయన తరఫు న్యాయవాదులు గత నేర చరిత్ర లేకపోవడం, వ్యక్తిగత పరిస్థితులను పరిగణనలోకి తీసుకుని 144 నెలల శిక్ష విధించాలని అభ్యర్థించారు.

న్యూయార్క్‌లో నివసిస్తున్న గురుపత్వంత్ సింగ్ పన్నూన్ హత్యకు సంబంధించిన ఈ కేసు అంతర్జాతీయంగా చర్చనీయాంశమైంది. నవంబర్ 20న అమెరికా కోర్టు వెలువరించనున్న తీర్పుపై ఆసక్తి నెలకొంది.