News

చైనాలో మళ్ళీ విజృంభిస్తున్న కరోనా

230views

* అమెరికా, ఆస్ట్రేలియా, స్విట్జర్లాండ్, జర్మనీల్లోనూ పెరుగుతున్న కేసులు

చైనాను గడగడలాడిస్తున్న కరోనా ప్రపంచ దేశాల్లోనూ విస్తరిస్తోంది. మరోసారి కోరలు చాస్తోంది. చైనా, అమెరికా, జర్మనీల్లో మళ్లీ కేసుల సంఖ్య పెరుగుతూండటం ఆందోళన కలిగిస్తోంది. రోజువారీ కేసుల పెరుగుదల నమోదవుతున్న నేపథ్యంలో భవిష్యత్తులో కరోనా ముప్పు తీవ్రమయ్యే ప్రమాదమున్నదని చైనాలోని వైద్యవర్గాలు హెచ్చరిస్తున్నాయి. కాగా కరోనా కేసులు అనూహ్యంగా పెరుగు తూండటంతో చైనా కఠిన ఆంక్షలను అమలు చేస్తోంది. రోజురోజుకూ కేసులు పెరుగుతూండటంతో చైనాలోని అనేక ప్రధాన నగరాల్లో లాక్ డౌన్ విధించింది. ప్రస్తుతం చైనాలో విస్తరిస్తున్న కరోనా వైరస్ ఒమిక్రాన్ సబ్ వేరియంట్. దానిని బీఏ-2గాను, స్టెల్త్ ఒమిక్రాన్ వేరియంట్గానూ పిలుస్తున్నారు.

ఈ వైరస్ వల్ల ప్రాణహాని తక్కువే అయినప్పటికీ అతివేగంగా విస్తరిస్తోంది. లక్షణాలు బయటకు కన్పించకపోవడం దీని ప్రధాన లక్షణం. పరీక్షిస్తే తప్ప కరోనా రోగి ఎవరన్నది తేలడంలేదు. అమెరికాలో సైతం ఫిబ్రవరి మొదటి వారంలో కరోనా ఉధృతమైంది. ఆ తర్వాత నెమ్మదిగా కేసుల సంఖ్య తగ్గుతూ వచ్చింది. ప్రస్తుతం కొన్ని ప్రాంతాల్లో మళ్లీ పెరుగుతున్నట్లుగా సమాచారం. ముందు ముందు కేసుల సంఖ్య మరింతగా పెరగవచ్చునని అమెరికా నిపుణులు ఆందోళన వ్యక్తం చేస్తున్నారు. మరోవైపు స్విజర్లాండ్, ఆస్ట్రేలియాలలోనూ కేసులు పెరుగుతున్నాయి. ఇక జర్మనీలోనూ గడచిన వారం రోజుల్లో 42000 కొత్త కేసులు నమోదయ్యాయి.

మరిన్ని జాతీయ, అంతర్జాతీయ వార్తలు, విశేషాల కోసం VSK ANDHRAPRADESH యాప్ ను డౌన్ లోడ్ చేసుకోవడానికి ఇక్కడ క్లిక్ చెయ్యండి.