ముష్కర మూకతో చేతులు కలిపేందుకు సిద్ధమైన 14 మంది యువకుల మనసును పోలీసులు మార్చారు. కౌన్సిలింగ్ ఇప్పించి వారిని తల్లిదండ్రుల చెంతకు చేర్చారు. జమ్ముకశ్మీర్ అనంతనాగ్ జిల్లాలో ఈ సంఘటన జరిగింది.
18 నుంచి 22 ఏళ్ల మధ్య ఉన్న ఈ యువకులు స్థానిక ఉగ్రవాదులతో సంబంధాలు ఏర్పరుచుకున్నారు. సామాజిక మాధ్యమాల ద్వారా పాకిస్థాన్కు చెందిన ఉగ్రసంస్థల్లో చేరేందుకు సిద్ధమయ్యారు. వీరిని అనంత్నాగ్ జిల్లా పోలీసులు గుర్తించి తమ తల్లిదండ్రులకు మంగళవారం అప్పగించారు. ఈ కార్యక్రమంలో అనంత్నాగ్ జిల్లాలోని వివిధ ప్రాంతాలకు చెందిన ప్రజలు పాల్గొన్నారు.
కొన్ని రోజుల క్రితమే ఈ యువకులను పోలీసులు అరెస్టు చేశారు. అప్పటినుంచి వీరికి కౌన్సిలింగ్ ఇచ్చారు. తమ పిల్లలు ఎలాంటి కార్యకలాపాలకు పాల్పడుతున్నారో తల్లిదండ్రులు ఎల్లప్పుడూ పర్యవేక్షిస్తూ ఉండాలని అనంతనాగ్ ఎస్ ఎస్ పీ ఇంతియాజ్ హుస్సేన్ తెలిపారు.
