శ్రీరంగపట్నంలో బోనాల జాతర

అనాదిగా వస్తున్న ఆచారం : ఆషాఢ మాసంలో అమ్మవారికి ఇలా బోనాలు సమర్పించడం శ్రీరంగపట్నం గ్రామంలో ఆనవాయితీగా వస్తోంది. ఇది ఈనాటి ఆచారం కాదు. అనాదిగా తమ పూర్వీకుల నుంచి వస్తున్న సంప్రదాయమని గ్రామ పెద్దలు చెబుతున్నారు. ఈ ఏడాది ఈ జాతర మహోత్సవం 101వ వసంతంలోకి అడుగుపెట్టింది. 101వ జాతర కావడంతో నిర్వాహకులు, గ్రామస్థులు భారీ ఏర్పాట్లు చేశారు. దీంతో మునుపెన్నడూ లేని విధంగా బోనాలు సమర్పించేందుకు మహిళలు పెద్ద ఎత్తున తరలివచ్చారు.

స్వగ్రామాలకు క్యూ కట్టిన ఆడపడుచులు : ఈ మోదుకొండమ్మ జాతరకు మరో ప్రత్యేకత కూడా ఉంది. శ్రీరంగపట్నం గ్రామానికి చెందిన ఎంతోమంది ఉపాధి నిమిత్తం వివిధ ప్రాంతాల్లో స్థిరపడ్డారు. కొందరు ఉద్యోగాల కోసం వెళ్లగా, మరికొందరు వ్యాపారాల కోసం పట్టణాలకు వలస వెళ్లారు. అలాగే వివాహాలు చేసుకుని ఇతర ప్రాంతాలకు వెళ్లిన ఆడపడుచులు సైతం ఈ జాతర కోసం స్వగ్రామానికి చేరుకున్నారు. సుదూర ప్రాంతాల నుంచి ప్రత్యేకంగా విచ్చేసి అమ్మవారిని దర్శించుకున్నారు. బోనాలు సమర్పించి తమ మొక్కులు తీర్చుకున్నారు.

పాడిపంటలు సమృద్ధిగా పండాలని : గ్రామంలో పాడిపంటలు సమృద్ధిగా పండాలని ఈ సందర్భంగా భక్తులు అమ్మవారిని వేడుకున్నారు. ప్రజలందరూ ఎలాంటి రోగాల బారిన పడకుండా, ఆయురారోగ్యాలతో వర్ధిల్లాలని ప్రార్థించారు. ఊరి ప్రజలంతా సుఖసంతోషాలతో ఉండాలని, కష్టాలను కడతేర్చాలని మోదుకొండమ్మ తల్లిని భక్తితో కొలిచారు. పిల్లాపాపల చల్లగా చూడాలని వేడుకున్నారు.

ఆధ్యాత్మిక శోభతో మార్మోగిన పల్లె : జాతర సందర్భంగా శ్రీరంగపట్నం గ్రామమంతా పండుగ వాతావరణం నెలకొంది. ఎటు చూసినా పసుపు, కుంకుమలు, తలపై బోనాలతో మహిళలు సందడి చేశారు. మోదుకొండమ్మ ఆలయ పరిసరాలు భక్తజన సందోహంతో ఉదయం నుంచే కళకళలాడాయి. సంప్రదాయ వాయిద్యాల హోరు, డప్పుల మోతతో పల్లె వీధులు మార్మోగాయి. భక్తి గీతాల ఆలాపనల మధ్య వేడుకలు వైభవంగా సాగాయి.