గ్రామీణ ప్రాంతాల్లో ఆధ్యాత్మిక చైతన్యాన్ని పెంపొందించేందుకు మరియు ప్రాచీన దేవాలయాల పరిరక్షణకు దేవాదాయ ధర్మాదాయ శాఖ ప్రత్యేక చర్యలు చేపడుతోందని పశ్చిమ గోదావరి జిల్లా దేవాదాయ ధర్మాదాయ శాఖ అధికారి కె. శ్రీనివాస్ తెలిపారు. ధూపదీప నైవేద్య (డీడీఎన్) పథకం కింద సేవలు అందిస్తున్న ఆలయాల అభివృద్ధికి సమగ్ర ప్రణాళికలు రూపొందిస్తున్నామని ఆయన వెల్లడించారు.
కొయ్యలగూడెంలో నూతనంగా నిర్మాణంలో ఉన్న శ్రీవల్లీ దేవసేన సమేత సుబ్రహ్మణ్యేశ్వర స్వామి ఆలయం నిర్మాణ పనులను ఆయన పరిశీలించారు. ఆలయ నిర్మాణం శాస్త్రోక్తంగా, భక్తులకు సౌకర్యవంతంగా కొనసాగాలని అధికారులకు సూచనలు చేశారు. ఆలయ పరిసరాల్లో భక్తులకు అవసరమైన మౌలిక వసతులు, పరిశుభ్రత, నీటి సదుపాయాలు, దీపాలంకరణ తదితర అంశాలపై ప్రత్యేక దృష్టి సారించాలని తెలిపారు.
అనంతరం గ్రామదేవతగా పూజలందుకుంటున్న శ్రీ చింతాలమ్మ అమ్మవారి ఆలయం వద్ద పరిస్థితులను పరిశీలించి, ఆలయ అభివృద్ధికి సంబంధించిన వివరాలను సేకరించారు. గ్రామ దేవత ఆలయాలు గ్రామ సంస్కృతి, సంప్రదాయాలకు కేంద్రబిందువులని, ఇటువంటి ఆలయాల పరిరక్షణ ప్రతి హిందువు బాధ్యత అని ఆయన పేర్కొన్నారు.
ఇదే సందర్భంగా బుట్టాయిగూడెం మండలం పరిధిలోని పులిరామన్నగూడెం రోడ్డులో ఉన్న సూదికొండ మావుళ్ళమ్మ ఆలయం అభివృద్ధికి కూడా ప్రత్యేక ప్రణాళికలు సిద్ధం చేస్తున్నామని వెల్లడించారు. భక్తులకు సౌకర్యాలు కల్పించడం, ఆలయ ప్రాంగణ అభివృద్ధి, పండుగల నిర్వహణ, నిత్యపూజలు సక్రమంగా జరగేందుకు అవసరమైన చర్యలు తీసుకుంటామని చెప్పారు.
హిందూ ధార్మిక సంప్రదాయాలను గ్రామస్థాయిలో బలపరచడంలో చిన్న ఆలయాలు కీలక పాత్ర పోషిస్తున్నాయని, ధూపదీప నైవేద్య పథకం ద్వారా ఆర్థికంగా వెనుకబడిన దేవాలయాలకు నూతన ఉత్సాహం లభిస్తోందని ఆయన అభిప్రాయపడ్డారు. ప్రభుత్వం మరియు భక్తులు కలిసి ఆలయాల పరిరక్షణకు కృషి చేస్తే, భవిష్యత్ తరాలకు భారతీయ ఆధ్యాత్మిక వారసత్వాన్ని సమగ్రంగా అందించవచ్చని ఆయన తెలిపారు.
