ముంబై: గణేశ నిమజ్జనాల అనంతరం సేకరించే ప్లాస్టర్ ఆఫ్ ప్యారిస్ (POP)ను ఉపయోగించి బెంచీలు, ఇటుకలు, అలంకరణ వస్తువులు తయారు చేసే ప్రతిపాదన మహారాష్ట్రలో చర్చనీయాంశంగా మారింది. గణేశ భక్తులు పూజించి నిమజ్జనం చేసిన విగ్రహాల అవశేషాలను సాధారణ నిర్మాణ సామగ్రిగా వినియోగించడం ధార్మికంగా సముచితమేనా అనే ప్రశ్నలు వ్యక్తమవుతున్నాయి.
బృహన్ముంబై మున్సిపల్ కార్పొరేషన్ -BMC నాసిక్కు చెందిన ఆకర్మ ఫౌండేషన్ సహకారంతో ఈ ప్రయోగాత్మక ప్రాజెక్టును చేపట్టింది. 2025లో ముంబైలో నిమజ్జనం చేసిన గణేశ విగ్రహాల నుండి సుమారు 2,500 టన్నుల POP సేకరించబడినట్లు అధికారులు తెలిపారు.
ప్రయోగాత్మకంగా 10 టన్నుల POPను శుద్ధి చేయగా, అందులో కొబ్బరి పీచు, వస్త్రాలు, కలప, రాళ్లు, మట్టి వంటి పదార్థాలు పెద్ద మొత్తంలో బయటపడ్డాయి. ఫలితంగా 10 టన్నులలో కేవలం 3.5 టన్నుల స్వచ్ఛమైన POP మాత్రమే మిగిలిందని వెల్లడైంది. ఈ పదార్థంతో ప్రజా ఉద్యానవనాల కోసం బెంచీలు, ఇటుకలు, అలంకరణ వస్తువులు తయారు చేసే అవకాశాలను పరిశీలిస్తున్నారు.
అయితే హిందూ ధార్మిక వర్గాలు ఈ అంశంపై జాగ్రత్తగా వ్యవహరించాలని సూచిస్తున్నాయి. గణేశ విగ్రహాలు భక్తుల ఆరాధనకు కేంద్రబిందువులని, పూజలు నిర్వహించిన విగ్రహాల అవశేషాలను ఇతర ప్రయోజనాలకు వినియోగించే ముందు ధర్మశాస్త్ర నిపుణులు, ఆగమ పండితుల అభిప్రాయాలను తీసుకోవాల్సిన అవసరం ఉందని పేర్కొంటున్నారు.
ఈ విషయంపై స్పందించిన BMC పర్యావరణ విభాగ డిప్యూటీ కమిషనర్ ప్రదీప్ గవాలి, ప్రభుత్వ కమిటీ నివేదిక వచ్చిన తర్వాతే తదుపరి నిర్ణయం తీసుకుంటామని స్పష్టం చేశారు.
హైకోర్టు ఆదేశాలతో కమిటీ ఏర్పాటు
2025లో బాంబే హైకోర్టు, నిమజ్జనం చేసిన POP విగ్రహాల పారవేతపై దీర్ఘకాలిక విధానం రూపొందించాలని రాష్ట్ర ప్రభుత్వాన్ని ఆదేశించింది. అనంతరం ప్రభుత్వం ప్రముఖ అణు శాస్త్రవేత్త డాక్టర్ అనిల్ కకోడ్కర్ నేతృత్వంలో ప్రత్యేక కమిటీని ఏర్పాటు చేసింది.
ఈ కమిటీ నివేదిక ఇంకా వెలువడలేదు. నివేదిక ఆధారంగా ప్రభుత్వం తన విధానాన్ని రూపొందించి కోర్టుకు సమర్పించనుంది. అనంతరం POP విగ్రహాల నిర్వహణ, పునర్వినియోగంపై తుది నిర్ణయం తీసుకోనున్నారు.
గణేశోత్సవాల అనంతరం విగ్రహాల అవశేషాల నిర్వహణలో పర్యావరణ పరిరక్షణతో పాటు హిందూ ధార్మిక భావాలను కూడా గౌరవించే విధంగా ప్రభుత్వం నిర్ణయాలు తీసుకోవాలని భక్తులు కోరుతున్నారు.
