వారణాసి జ్ఞానవాపి సముదాయం సమీపంలో గోడపై వేసిన కాషాయ మధుబని చిత్రలేఖనం వివాదానికి దారితీసింది. శుక్రవారం ప్రార్థనలకు ముందు కాశీ విశ్వనాథ ఆలయం గేట్ నెం. 4 సమీపంలో కొద్దిసేపు ఉద్రిక్త పరిస్థితి నెలకొంది. అయితే పోలీసులు భారీగా మోహరించడంతో ఎలాంటి అవాంఛనీయ సంఘటనలు చోటుచేసుకోలేదు.
ప్రార్థనలు ఎలాంటి అంతరాయం లేకుండా ప్రశాంతంగా జరిగినప్పటికీ, కొందరు స్థానికులు యథాతథ స్థితిని కొనసాగించాల్సిన అవసరం ఉందని అభిప్రాయపడ్డారు.
వక్ఫ్ భూమి అంటూ అభ్యంతరం
“ముఫ్తీ-ఎ-బనారస్”గా గుర్తింపు పొందిన మౌలానా అబ్దుల్ బతీన్ నోమానీ ఈ చిత్రలేఖనంపై తీవ్ర అభ్యంతరం వ్యక్తం చేశారు. ఆ గోడ ఉన్న భూమి వక్ఫ్కు చెందినదని, సంబంధిత అనుమతులు లేకుండా చిత్రాన్ని గీసారని ఆయన ఆరోపించారు. ఈ విషయంపై ఇప్పటికే లిఖితపూర్వక ఫిర్యాదు సమర్పించినట్లు తెలిపారు. చిత్రాన్ని తొలగించాలని అధికారులను మళ్లీ సంప్రదిస్తామని పేర్కొన్నారు.
పోలీసుల వివరణ
ఇదిలా ఉండగా, కాశీ డిప్యూటీ కమిషనర్ ఆఫ్ పోలీస్ గౌరవ్ బన్సల్ స్పందిస్తూ ఆ చిత్రలేఖనం పూర్తిగా సాంస్కృతికమైనదని తెలిపారు. ఆ గోడ జ్ఞానవాపి సముదాయం పరిధిలోకి రాదని స్పష్టం చేశారు. చట్టాన్ని తమ చేతుల్లోకి తీసుకునే ప్రయత్నాలు చేసే వారిపై కఠిన చర్యలు తీసుకుంటామని హెచ్చరించారు.
