వాషింగ్టన్: భారత్‌లో మత స్వేచ్ఛకు సంబంధించిన అంశాలపై అమెరికాకు చెందిన అంతర్జాతీయ మత స్వేచ్ఛ కమిషన్ (USCIRF) మరోసారి కీలక వ్యాఖ్యలు చేసింది. దేశంలోని సిక్కు గురుద్వారాలపై ఇటీవల దాడులు జరిగాయని, మత పెద్దలను లక్ష్యంగా చేసుకునే ప్రయత్నాలు కూడా చోటుచేసుకున్నాయని ఆరోపించింది. ఈ నేపథ్యంలో భారత ప్రభుత్వానికి అందించే భద్రతా సహాయాన్ని కొన్ని షరతులకు లోబరచాలని అమెరికా ప్రభుత్వానికి సూచించింది.
నవంబర్ 5న సోషల్ మీడియా వేదిక ‘ఎక్స్’లో USCIRF కమిషనర్ డేవిడ్ ఆండర్సన్ చేసిన పోస్టులో, గత కొన్ని వారాలుగా భారత్‌లోని సిక్కు గురుద్వారాలు అప్రమత్తం కావాల్సిన పరిస్థితులు ఎదుర్కొంటున్నాయని పేర్కొన్నారు. మత స్వేచ్ఛను అడ్డుకునే హింసాత్మక ఘటనలపై భారత ప్రభుత్వం తీసుకునే చర్యలను బట్టి అమెరికా భద్రతా సహాయాన్ని అనుసంధానించాలని ఆయన సూచించారు.
మరో కమిషనర్ జో గ్రోగన్ కూడా గురుద్వారాలు, మసీదులు, చర్చిలపై దాడులు మత స్వేచ్ఛకు విఘాతం కలిగిస్తాయని వ్యాఖ్యానించారు. ప్రార్థనా స్థలాలపై దాడులకు పాల్పడిన వారిని గుర్తించి, బాధ్యులపై చర్యలు తీసుకునేలా భారత ప్రభుత్వంపై అమెరికా ఒత్తిడి తేవాలని కోరారు.
USCIRF అసలు ఏం సిఫార్సు చేసింది?
భారత్‌తో అమెరికా కొనసాగిస్తున్న భద్రతా సహకారానికి మత స్వేచ్ఛకు సంబంధించిన అంశాలను ముడిపెట్టాలని USCIRF కమిషనర్లు సూచించారు. ప్రార్థనా స్థలాలపై దాడులను అరికట్టడం, మత పెద్దలకు రక్షణ కల్పించడం, నేరాలకు పాల్పడిన వారిని చట్టం ముందు నిలబెట్టడం వంటి అంశాల్లో భారత ప్రభుత్వం తీసుకునే చర్యలను పరిగణనలోకి తీసుకోవాలని కోరారు. అయితే ఇవి USCIRF కమిషనర్ల సిఫార్సులు మాత్రమే. అమెరికా ప్రభుత్వం తప్పనిసరిగా అమలు చేయాల్సిన ఆదేశాలు కావు.
అసలు ఈ USCIRF ఎవరు?
యునైటెడ్ స్టేట్స్ కమిషన్ ఆన్ ఇంటర్నేషనల్ రిలీజియస్ ఫ్రీడమ్ (USCIRF) అనేది 1998లో అమెరికా కాంగ్రెస్ చట్టం ద్వారా ఏర్పాటు చేసిన స్వతంత్ర, ద్వైపాక్షిక సమాఖ్య ప్రభుత్వ కమిషన్. ప్రపంచవ్యాప్తంగా మత స్వేచ్ఛ పరిస్థితులను పరిశీలించడం, నివేదికలు రూపొందించడం, అమెరికా అధ్యక్షుడు, విదేశాంగ శాఖ కార్యదర్శి, కాంగ్రెస్‌కు విధానపరమైన సిఫార్సులు చేయడం దీని ప్రధాన బాధ్యతలు.ఈ కమిషన్ సిఫార్సులు సలహా స్వరూపంలో ఉంటాయి. తుది నిర్ణయాలు తీసుకునే అధికారం అమెరికా ప్రభుత్వానిదే.
అయితే భారత్‌కు సంబంధించి USCIRF గత కొన్నేళ్లుగా చేస్తున్న వ్యాఖ్యలు, నివేదికలపై భారత ప్రభుత్వం అభ్యంతరాలు వ్యక్తం చేస్తోంది. ముఖ్యంగా 2026 వార్షిక నివేదికలో భారత్‌ను ‘కంట్రీ ఆఫ్ పార్టిక్యులర్ కన్సర్న్’ (CPC)గా గుర్తించాలని, కొన్ని వ్యక్తులు, సంస్థలపై ఆంక్షలు విధించాలని, భద్రతా సహాయాన్ని మత స్వేచ్ఛ పరిస్థితులతో అనుసంధానించాలని సిఫార్సు చేసింది.
గురుద్వారాల ఘటనలపై పోలీసుల దర్యాప్తు ఏం చెబుతోంది?
పంజాబ్‌లోని లూథియానా జిల్లాలో అక్టోబర్ చివరి వారంలో రెండు గురుద్వారాలకు సంబంధించిన కాల్పుల ఘటనలు వెలుగులోకి వచ్చాయి. ఈ ఘటనలను USCIRF ప్రస్తావిస్తూ మతపరమైన దాడులుగా అభివర్ణించింది.అయితే ఈ ఘటనల వెనుక మతపరమైన కారణాలే ఉన్నాయా అనే అంశంపై స్పష్టత రావాల్సి ఉంది. మీడియా కథనాల ప్రకారం, ఒక ఘటనలో వ్యక్తిగత కారణాలతో గురుద్వారా ప్రధాన సేవాదార్ స్వయంగా దాడిని ప్రేరేపించినట్లు పంజాబ్ పోలీసుల దర్యాప్తులో ఆరోపణలు వెలుగులోకి వచ్చాయి. మరో ఘటనకు సంబంధించిన కారణాలు ఇంకా స్పష్టంగా తెలియాల్సి ఉంది.దీంతో USCIRF చేసిన వ్యాఖ్యలు, స్థానిక పోలీసుల దర్యాప్తులో వెలుగుచూస్తున్న అంశాల మధ్య వ్యత్యాసం కనిపిస్తోంది.
భారత ప్రభుత్వ అభ్యంతరాలు
USCIRF నివేదికలు, సిఫార్సులపై భారత విదేశాంగ మంత్రిత్వ శాఖ గతంలో పలుమార్లు తీవ్ర అభ్యంతరాలు వ్యక్తం చేసింది. 2026 మార్చి 16న విడుదల చేసిన అధికారిక ప్రకటనలో USCIRF భారత్‌పై చేసిన వ్యాఖ్యలను పక్షపాతపూరితమైనవి, ప్రేరేపితమైనవి, వక్రీకరించిన సమాచారంపై ఆధారపడినవిగా అభివర్ణించింది.
అమెరికాలో హిందూ దేవాలయాలపై జరుగుతున్న విధ్వంసం, భారతీయ సంతతికి చెందిన ప్రజలపై పెరుగుతున్న బెదిరింపులు, దాడుల వంటి అంశాలపై కూడా USCIRF దృష్టి సారించాలని భారత విదేశాంగ శాఖ సూచించింది.
