ఎన్నో ప్రాచీన యుద్ధకళలకు నిలయం భారతదేశం. కళ్లకు గంతలు కట్టుకుని చుట్టూ ఉన్న పరిస్థితులను మనసుతో అంచనా వేస్తూ కత్తిసాము చేయడం, దారి వెంబడి వెళ్లడం ఇవన్నీ ఒకప్పటి విద్యలు. గాంధార విద్యగా పిలిచే ఈ ప్రక్రియకు తిరిగి ప్రాచుర్యం కల్పించడానికి ప్రయత్నిస్తున్నారు ప్రభుత్వ పాఠశాల విశ్రాంత ప్రధానోపాధ్యాయుడు కవి వరప్రసాదరావు. వైఎస్సార్ కడప జిల్లా వేంపల్లెకు చెందిన 20 మంది విద్యార్థులకు నీలిమ అనే శిక్షకురాలితో ఆయన గాంధార విద్యలో ట్రైనింగ్ ఇప్పిస్తున్నారు. సుమారు 3 నెలలుగా శిక్షణ తీసుకుంటున్న విద్యార్థులు కళ్లకు గంతలు కట్టుకొని చదవడం, రాయడం, రంగులు గుర్తించడం, చెస్, క్యారమ్స్ ఆడటం, చెక్కభజన, కర్రసాము, సైక్లింగ్, బైక్ రైడింగ్ తదితరాలను సులభంగా చేసేస్తూ ఔరా అనిపిస్తున్నారు. ఈ విద్యతో తమకు ఏకాగ్రత పెరిగి చదువులో కూడా సులువుగా రాణిస్తున్నామని వారు చెబుతున్నారు.
