భువనేశ్వర్: ప్రముఖ పుణ్యక్షేత్రం పూరిని పూర్తి స్థాయి తీర్థయాత్ర నగరంగా అభివఈద్ధి చేసే దిశగా ఓ ముఖ్యమైన నిర్ణయాన్ని తీసుకుంది ఒడిశా ప్రభుత్వం. శ్రీ జగన్నాథ ఆలయానికి రెండు కిలోమీటర్ల పరిధిలో మద్యం, మాంసాహార పదార్థాలు అమ్మకంపై పూర్తి నిషేధాన్ని విధించాలని ప్రతిపాదించింది. రాష్ట్ర న్యాయ మంత్రి పృథ్వీరాజ్ హరిచందన్ ఈ విషయాన్ని వెల్లడించారు.
ఈ మేరకు పృథ్వీరాజ్ హరిచందన్ మీడియాతో మాట్లాడుతూ పూరీ ఒక ధార్మికమైన నగరం. దీన్ని ఒక ఆదర్శవంతమైన తీర్థస్థలంగా రూపొందించాలన్నది మా ఆకాంక్ష. అందుకోసం రథం ఎంత దూరమైతే వస్తుందో, అంతదూరం అంటే మందిరానికి దాదాపు రెండుకిలోమీటర్ల దూరం వరకు ఎలాంటి మద్య, మాంసాహార షాపులను నిర్వహించకూడదనే నిర్ణయాన్ని తీసుకున్నాం. నిషేధం అమలు చేసిన తేదీని అధికారికంగా ప్రకటించనప్పటికీ, అది దశలవారీగా అమలు చేయబడుతుందని వారు స్పష్టం చేశారు, తద్వారా వ్యాపారస్థులు తదనుగుణంగా వారి షాపులను మార్చుకునే వీలు ఉంటుంది.
ప్రభుత్వ వర్గాల సమాచారం ప్రకారం, ప్రతిపాదిత నిషేధం ప్రస్తుతం రెండు మద్యం దుకాణాలు, రెండు బార్లను ప్రత్యక్షంగా ప్రభావితం చేస్తుంది, వీటిని వేరే చోటకు తరలించనున్నారు. అంతేకాకుండా, 70కి పైగా మాంసాహార దుకాణాలు, హోటళ్ళు కూడా అక్కడ స్థలాన్ని ఖాళీ చేయాల్సి ఉంటుంది. వారు వేరే చోటకు వెళ్లాల్సి ఉంటుంది. శ్రీ జగన్నాథ ఆలయ పాలక వ్యవస్థ, గృహ పట్టణాభివృద్ధి శాఖ సహకారంతో, బడా దండా ప్రాంతంలోని భవనాల ఎత్తు, నిర్మాణాన్ని ఏకరీతిగా మార్చడానికి ఒక ప్రణాళిక కూడా జరుగుతోంది, తద్వారా ఆలయ ప్రాంతానికి చెందిన నిర్మాణ వారసత్వం, మతపరమైన గౌరవాన్ని కాపాడవచ్చు.
2025 రథయాత్ర సన్నాహాలకు సంబంధించి ఉన్నత స్థాయి సమీక్ష సమావేశం…
శ్రీ జగన్నాథుని వార్షిక రథయాత్రను జూన్ 27న నిర్వహించాలని ప్రతిపాదించబడింది. ఈ నేపథ్యంలో సోమవారం పూరీలోని పౌర సదన్లో ఒక ముఖ్యమైన సమన్వయ సమావేశం జరిగింది. ఈ సమావేశానికి న్యాయ మంత్రి పృథ్వీరాజ్ హరిచందన్ అధ్యక్షత వహించారు. ఈ సమావేశంలో పట్టణాభివృద్ధి మంత్రి కృష్ణ చంద్ర మహాపాత్ర, ఆరోగ్య మంత్రి డాక్టర్ ముఖేష్ మహాలింగ్, రవాణా మంత్రి బిభూతి భూషణ్, ఉన్నత విద్యామంత్రి సూర్యవంశీ సూరజ్తో సహా పలువురు సీనియర్ అధికారులు పాల్గొన్నారు. ఈ సందర్భంగా మంత్రి హరిచందన్ మాట్లాడుతూ ఇప్పటివరకు దాదాపు 80% పనులు పూర్తయ్యాయని, మిగిలిన పనులు సకాలంలో పూర్తవుతాయని తెలియజేశారు. జగన్నాథుడే స్వయంగా రథయాత్ర నిర్వహిస్తాడని, మనమందరం కేవలం సహాయకులమేనని అన్నారు. రోడ్ల మరమ్మత్తు, పరిశుభ్రత, ఆరోగ్య సేవలు, భద్రత, రవాణా, జనసమూహ నియంత్రణ, రైల్వే సమన్వయం వంటి ముఖ్యమైన అంశాలపై ఈ సమావేశంలో చర్చించారు. రథ నిర్మాణ పురోగతిని కూడా సమీక్షించి, పనులు సకాలంలో పూర్తవుతున్నాయని చెప్పారు.
ఆరోగ్య సేవలకు సంబంధించి, రథయాత్ర సందర్భంగా 300 మంది వైద్యులను ఏర్పాటుచేస్తామని, తాత్కాలిక బర్న్ యూనిట్లు, ఐసియు పడకలను ఏర్పాటు చేస్తామని మంత్రి డాక్టర్ మహాలింగ్ అన్నారు. ఇది కాకుండా, స్థానిక ఆసుపత్రులలో 15 శాశ్వత ఐసియు పడకలను ముందే ఏర్పాటు చేస్తామని ఆయన అన్నారు. కోవిడ్-19 గురించి నిర్దిష్ట హెచ్చరిక లేదు, కానీ ప్రభుత్వం అన్ని ముందు జాగ్రత్త చర్యలను చేపడుతుంని, ప్రజా అవగాహన ప్రచారాలను కూడా నిర్వహిస్తుంది అని ఈ సందర్భంగా వారు తెలిపారు.
