విజయవాడ: ఆధ్యాత్మిక నగరం కాశీకి వెళ్లే ఆంధ్రప్రదేశ్ భక్తులకు శుభవార్త. విజయవాడ అంతర్జాతీయ విమానాశ్రయం నుంచి వారణాసికి నేరుగా కొత్త ఇండిగో విమాన సర్వీసులు అందుబాటులోకి వచ్చాయి. ఈ నూతన విమాన సర్వీసులను కేంద్ర పౌర విమానయాన శాఖ మంత్రి కింజరాపు రామ్మోహన్నాయుడు వర్చువల్గా ప్రారంభించారు.
వారానికి మూడు రోజులు ప్రయాణం
విజయవాడ–వారణాసి మధ్య నేరుగా నడిచే ఈ విమాన సర్వీసులు వారంలో మూడు రోజులు.. మంగళవారం, గురువారం, శనివారం అందుబాటులో ఉంటాయి. దీంతో ఏపీ నుంచి కాశీ విశ్వనాథుడి దర్శనం, గంగాస్నానం తదితర ఆధ్యాత్మిక యాత్రలకు వెళ్లే భక్తులకు ప్రయాణ సమయం గణనీయంగా తగ్గనుంది.
ఇప్పటివరకు ఇతర మార్గాల్లో ప్రయాణించాల్సి వచ్చిన భక్తులకు ఈ డైరెక్ట్ విమాన సర్వీసు మరింత సౌకర్యవంతంగా మారనుంది. ముఖ్యంగా వృద్ధులు, కుటుంబాలతో కాశీ యాత్రకు వెళ్లేవారికి ఈ కనెక్టివిటీ ప్రయోజనం చేకూరనుంది.
ప్రాంతీయ విమాన కనెక్టివిటీకి ప్రోత్సాహం
టైర్-2, టైర్-3 నగరాలను ప్రధాన విమానాశ్రయాలతో అనుసంధానం చేయడం ద్వారా దేశంలో ప్రాంతీయ విమాన కనెక్టివిటీని బలోపేతం చేయడమే కేంద్ర ప్రభుత్వ లక్ష్యమని మంత్రి రామ్మోహన్నాయుడు తెలిపారు.
విజయవాడ నుంచి వారణాసికి నేరుగా విమాన సర్వీసు ప్రారంభం కావడం రాష్ట్ర విమానయాన రంగంలో మరో కీలక ముందడుగుగా ఆయన పేర్కొన్నారు. ఈ కొత్త కనెక్టివిటీతో ఆధ్యాత్మిక పర్యాటకానికి మరింత ఊతం లభిస్తుందని ఆశాభావం వ్యక్తం చేశారు.
కాశీకి వెళ్లాలనుకునే తెలుగు రాష్ట్రాల భక్తులకు విజయవాడ నుంచి నేరుగా విమాన ప్రయాణ సౌకర్యం అందుబాటులోకి రావడంతో ఈ యాత్ర మరింత సులభతరం కానుంది.
