జార్ఖండ్లోని పశ్చిమ సింగ్భూమ్ జిల్లా, ఒకప్పుడు మావోయిస్టుల కంచుకోటగా వుండేది.నక్సల్స్ ఆ ప్రాంతంలో ఎలాంటి అభివృద్ధి కార్యక్రమాలను జరగనిచ్చేవారు కాదు. దీంతో ఆ ప్రాంతం అభివృద్ధికి దూరంగా వుండేది. కానీ.. కేంద్రం ఆపరేషన్ కగార్ చేపట్టిన తర్వాత పరిస్థితులు మారిపోయాయి. ఇప్పుడు ఆ ప్రాంతం నక్సల్స్ రహిత జిల్లాగా పరిగణించారు.
తాజాగా చైబాసాలో రూ. 10 లక్షల రివార్డు ఉన్న జోనల్ కమిటీ సభ్యుడితో సహా నలుగురు మావోయిస్టులు సీనియర్ పోలీసు మరియు సెంట్రల్ రిజర్వ్ పోలీస్ ఫోర్స్ (CRPF) అధికారుల ఎదుట లొంగిపోవడంతో, మావోయిజంపై సుదీర్ఘకాలంగా సాగుతున్న పోరాటంలో భద్రతా బలగాలది పై చేయి అయ్యింది.
నిషేధిత కమ్యూనిస్ట్ పార్టీ ఆఫ్ ఇండియా (మావోయిస్ట్)కు చెందిన నలుగురు కార్యకర్తలు లొంగిపోయారు. రూ. 10 లక్షల రివార్డు కలిగిన జోనల్ కమిటీ సభ్యుడు సలుక కైమ్; రూ. 1 లక్ష రివార్డు కలిగిన కోడోముని కోడ; అలాగే పింకీ పుర్తి మరియు అనిత తంసోయ్ లొంగిపోయారు.
ఆపరేషన్ నవజీవన్ 111’లో భాగంగా, కోల్హాన్ డీఐజీ అనురంజన్ కిస్పోట్టా మరియు సీఆర్పీఎఫ్ అధికారుల సమక్షంలో చైబాసా పోలీస్ కేంద్రం వద్ద వారు లొంగిపోయారు. ఈ కార్యక్రమం సందర్భంగా, డీఐజీ కిస్పోట్టా ఆ నలుగురికీ శాలువాలు కప్పి సత్కరించారు. ఈ కార్యక్రమంలో ఎస్పీ అమిత్ రేనుతో పాటు సీఆర్పీఎఫ్ మరియు జిల్లా పోలీసు బలగాల సిబ్బంది కూడా పాల్గొన్నారు.
నక్సల్ రహిత ప్రాంతంగా సింగ్ భూమ్..
సరందా, కోల్హన్, పోరాహత్ ఇప్పుడు నక్సల్ రహిత ప్రాంతాలు. చివరి నక్సల్స్ కూడా లొంగిపోయారు.ఈ ప్రాంతాలను మావోయిస్టుల ఉనికి లేకుండా జిల్లా పోలీసులు పూర్తిగా విముక్తం చేశారని DIG అనురంజన్ కిస్పోట్టా తెలిపారు. పోలీసు రికార్డుల ప్రకారం, పశ్చిమ సింగ్భూమ్ జిల్లాలో అరెస్టు చేయాల్సిన లేదా లొంగిపోయేలా ఒప్పించాల్సిన మావోయిస్టులెవరూ ప్రస్తుతం లేరు. అయితే, పొరుగున ఉన్న తూర్పు సింగ్భూమ్ మరియు సెరైకేలా-ఖర్సావాన్ జిల్లాల్లో సుమారు ఆరు నుండి ఏడుగురు మావోయిస్టులు ఇంకా క్రియాశీలకంగా ఉన్నారని భావిస్తున్నట్లు DIG పేర్కొన్నారు.
