విక్కీ కౌశల్, రష్మిక మందన్నా ప్రధాన పాత్రల్లో తెరకెక్కిన పీరియాడికల్ మూవీ ఛావా. మరాఠా యోధుడు ఛత్రపతి శివాజీ తనయుడు శంభాజీ మహారాజ్ జీవిత కథ ఆధారంగా లక్ష్మణ్ ఉటేకర్ ఈ సినిమాను తెరకెక్కించారు. ఫిబ్రవరి 14న విడుదలైన ఈ సినిమా ఏకంగా రూ. 700 కోట్లకు పైగా వసూళ్లు సాధించింది. ఇక మార్చి 07న తెలుగులోనూ ఛావా మూవీ రిలీజ్ కాగా, ఇక్కడ కూడా మంచి వసూళ్లే రాబడుతోంది. ఈ సినిమాలో మరాఠాలకు, మొఘలు పాలకులకు మధ్య ఘర్షణ, యుద్ధాలను ప్రధానంగా చూపించారు. ముఖ్యంగా మరాఠాలు ఎంతో ఆరాధించే ఛత్రపతి శివాజీ కుమారుడు శంభాజీ మహారాజ్ని ఔరంగజేబు క్రూరంగా హింసించడాన్ని సినిమాలో చూపించారు.
ఈ సినిమా రిలీజైన తర్వాత మహారాష్ట్రతో పాటు హిందువుల్లోనూ భావోద్వేగాలు పెరిగిపోయాయి. ఈ క్రమంలోనే మరాఠా గడ్డపై ఔరంగజేబు సమాధిని తొలగించాలనే నిరసనలు ప్రారంభమయ్యాయి. ఈ డిమాండ్ తోనే మహారాష్ట్రలోని నాగ్ పూర్ తదితర ప్రాంతాల్లో ఘర్షణలు చోటు చేసుకుంటున్నారు. ఈ క్రమంలోనే ఛావా సినిమాను నిషేధించాలని ముస్లిం మత గురువు మౌలానా షాబుద్దీన్ రజ్వీ కేంద్ర హోం మంత్రి అమిత్ షాకు లేఖ రాశారు. ఛావా సినిమా అల్లర్లు సృష్టించేలా ఉందని అందుకే ఈ సినిమాను ప్రదర్శించకుండా బ్యాన్ చేయాలని ఆయన డిమాండ్ చేశారు. ఇందుకు కారకులైన ఛావా రచయితలు, దర్శకుడు, నిర్మాతలపై చట్టపరమైన చర్యలు తీసుకోవాలి’ అని రజ్వీ లేఖలో డిమాండ్ చేశారు.
చరిత్రలో జరిగిన విషయాన్ని చూపించిన ఒక సినిమా పై ఈ విధంగా విషం కక్కడం దారుణమని విషయం తెలిసిన వారు ఆశ్చర్యం వ్యక్తం చేస్తున్నారు.
