న్యూఢిల్లీ: పాపులర్ ఫ్రంట్ ఆఫ్ ఇండియా (పీఎఫ్ఐ) అధికారిక ఖాతాను ట్విట్టర్ తొలగించింది. ఉగ్రవాద కార్యకలాపాలకు పాల్పడుతుండటంతో పీఎఫ్ఐతోపాటు దాని ఎనిమిది అనుబంధ సంఘాలపై కేంద్ర ప్రభుత్వం ఐదేండ్ల పాటు నిషేధం విధించిన విషయం తెలిసిందే. దీంతోపాటు పాపులర్ ఫ్రంట్కు సంబంధించిన వెబ్సైట్లు, సోషల్ మీడియా అకౌంట్లను బ్లాక్ చేయాలని సంబంధిత సంస్థలను కేంద్ర హోంఖ ఆదేశించింది.
దీంతో పీఎఫ్ఐ అధికారిక అకౌంట్ను ట్విట్టర్ నిలిపివేసింది. ఈ అకౌంట్ కు 81,000 మంది ఫాలోవర్స్ ఉన్నారు. సామజిక, ఆర్థిక, విద్యా, రాజకీయ సంస్థగా పనిచేస్తున్నప్పటికీ ఒక ప్రత్యేక వర్గాన్ని రాడికలైజ్ చేస్తూ, మన ప్రజాస్వామ్యం, రాజ్యాంగంలకు వ్యతిరేకంగా ఆపనిచేస్తున్నట్టు గుర్తించామని నిషేధపు ఉత్తరువులో ప్రభుత్వం పేర్కొన్నది.
‘స్టూడెంట్స్ ఇస్లామిక్ మూవ్మెంట్ ఆఫ్ ఇండియా (సిమి)కి చెందినవారే పీఎఫ్ఐ వ్యవస్థాపక సభ్యులు. వీరికి నిషేధిత జమాత్ ఉల్ ముజాయిద్దీన్ బంగ్లాదేశ్ (జేఎంబీ)తో సంబంధాలు ఉన్నాయి. అంతేకాదు.. ఐఎస్ఐఎస్తోనూ లింకులు ఉన్నాయి. పీఎఫ్ఐ, దాని అనుబంధ సంస్థలు దేశంలో ఉగ్రవాద కార్యకలాపాలను ప్రోత్సహిస్తున్నాయి. దేశంలో అసాంఘిక చర్యలకు పాల్పడేలా చేస్తున్నాయి’అని కూడా హోమ్ మంత్రిత్వ శాఖ స్పష్టం చేసింది.
కేంద్రం నిర్ణయంతో ఆ సంస్థకు చెందిన ఆస్తులు సీజ్ కానున్నాయి. బ్యాంక్ అకౌంట్లన్నింటినీ ఫ్రీజ్ చేస్తారు. కాగా, వారం రోజులుగా పీఎఫ్ఐ కార్యాలయాలు, సభ్యుల ఇండ్లపై ఎన్ఐఏ, ఇతర పోలీసు బృందాలు దాడులు నిర్వహించి, వందల మందిని అదుపులోకి తీసుకొన్న విషయం తెలిసిందే.
పీఎఫ్ఐని నిషేధించడానికి హోం మంత్రిత్వ శాఖ తన నోటిఫికేషన్లో ఏడు కారణాలను ప్రధానంగా ప్రస్తావించింది.
1. అంతర్గత భద్రతకు ముప్పు
పీఎఫ్ఐ అనేక క్రిమినల్, ఉగ్రవాద కేసులలో ఉంది. హోమ్ మంత్రిత్వ శాఖ ప్రకారం, దేశ రాజ్యాంగ అధికారం పట్ల పూర్తి అగౌరవాన్ని చూపుతుంది. విదేశాల నుండి నిధులు, సైద్ధాంతిక మద్దతుతో ఇది అంతర్గత భద్రతకు పెద్ద ముప్పుగా మారింది.
2. హింసాత్మక, విధ్వంసకర చర్యలు
పీఎఫ్ఐ, దాని కార్యకర్తలు పదే పదే హింసాత్మక, విధ్వంసక చర్యలకు పాల్పడుతున్నట్టు వివిధ కేసులలో దర్యాప్తులో వెల్లడైందని హోం మంత్రిత్వ శాఖ నోటిఫికేషన్ పేర్కొంది. ఈ సంస్థ నిర్వహిస్తున్న నేరపూరిత హింసాత్మక చర్యలలో కళాశాల ప్రొఫెసర్ అవయవాలను నరికివేయడం, ఇతర మతాలను సమర్థించే సంస్థలతో సంబంధం ఉన్న వ్యక్తులను హత్య చేయడం, ప్రముఖ వ్యక్తులు- స్థలాలను లక్ష్యంగా చేసుకుని పేలుడు పదార్థాలను ఉపయోగించడం, ప్రభుత్వ ఆస్తులను ధ్వంసం చేయడం వంటివి ఉన్నాయి.
3. ప్రజల మనస్సులో బీభత్సం సృష్టించడం కోసం హత్యలు
పీఎఫ్ఐ కార్యకర్తలు అనేక ఉగ్రవాద చర్యలు, అనేక మంది వ్యక్తుల హత్యలలో పాలుపంచుకున్నారు: సంజిత్ (కేరళ, నవంబర్, 2021), రామలింగం, (తమిళనాడు, 2019), నందు, (కేరళ, 2021), అభిమన్యు (కేరళ, 2018), బిబిన్ (కేరళ, 2017), శరత్ (కర్ణాటక, 2017), ఆర్. రుద్రేష్ (కర్ణాటక, 2016), ప్రవీణ్ పూజారి (కర్ణాటక, 2016), శశి కుమార్ (తమిళనాడు, 2016) , ప్రవీణ్ నెట్టకారు , (కర్ణాటక, 2022).
హోం మంత్రిత్వ శాఖ ప్రకారం, ప్రజాభద్రత, శాంతి, భద్రతలకు భంగం కలిగించడం, ప్రజల మనస్సులో బీభత్సం సృష్టించడం అనే ఏకైక లక్ష్యంతో పీఎఫ్ఐ కార్యకర్తలు ఈ నేర కార్యకలాపాలు, క్రూరమైన హత్యలను నిర్వహిస్తున్నారు.
4. ప్రపంచ ఉగ్రవాద గ్రూపులతో అంతర్జాతీయ అనుసంధానాలు
పీఎఫ్ఐకి చెందిన కొందరు కార్యకర్తలు ఇస్లామిక్ స్టేట్ ఆఫ్ ఇరాక్ అండ్ సిరియా (ఐఎస్ఐఎస్)లో చేరారని, సిరియా, ఇరాక్, ఆఫ్ఘనిస్తాన్లలో ఉగ్రవాద కార్యకలాపాల్లో పాల్గొన్నారని హోం మంత్రిత్వ శాఖ తెలిపింది. అలాగే, నోటిఫికేషన్ ప్రకారం, నిషేధిత ఉగ్రవాద సంస్థ జమాత్-ఉల్-ముజాహిదీన్ బంగ్లాదేశ్ (జీఎంబి)తో పిఎఫ్ఐ సంబంధాలు కలిగి ఉంది.
5. మనీ లాండరింగ్
పీఎఫ్ఐ ఆఫీస్ బేరర్, కార్యకర్తలు బాగా రూపొందించిన నేరపూరిత కుట్రలో భాగంగా భారతదేశం, విదేశాల నుండి బ్యాంకింగ్ మార్గాలు, విరాళాలు, హవాలా మొదలైన వాటి ద్వారా నిధులను సేకరించేందుకు కుట్ర పన్నారు. వారు ఈ నిధులను చట్టబద్ధంగా అంచనా వేయడానికి బహుళ ఖాతాల ద్వారా బదిలీ చేశారు. చివరికి ఈ నిధులను భారతదేశంలో వివిధ నేర, చట్టవిరుద్ధమైన, ఉగ్రవాద కార్యకలాపాలను నిర్వహించడానికి ఉపయోగించారు.
6. ఆదాయపు పన్ను మోసం
అనేక బ్యాంక్ ఖాతాలకు సంబంధించి పీఎఫ్ఐ తరపున డిపాజిట్ల మూలాలకు ఖాతాదారుల ఆర్థిక ప్రొఫైల్లు మద్దతు ఇవ్వలేదు. పీఎఫ్ఐ కార్యకలాపాలు వారి ప్రకటించిన లక్ష్యాల ప్రకారం నిర్వహించబడటం లేదు.
7. రాష్ట్రాల నుండి నిషేధించమని సిఫార్సులు
చివరగా ఉత్తరప్రదేశ్, కర్ణాటక, గుజరాత్ రాష్ట్ర ప్రభుత్వాలు కూడా పీఎఫ్ఐని నిషేధించాలని సిఫారసు చేశాయని నోటిఫికేషన్లో హోమ్ మంత్రిత్వ శాఖ పేర్కొంది. దేశంలో తీవ్రవాద పాలనను సృష్టించాలనే ఉద్దేశ్యంతో పీఎఫ్ఐ, దాని సహచరులు హింసాత్మక ఉగ్రవాద కార్యకలాపాలలో పాల్గొన్నారని, అందువల్ల సంస్థపై తక్షణ, సత్వర చర్య అవసరమని భావిస్తున్నట్టు హోమ్ మంత్రిత్వ శాఖ స్పష్టం చేసింది.
Source: Nijamtoday
