చైనాపై మరోసారి విరుచుకుపడ్డారు అమెరికా మాజీ అధ్యక్షుడు డొనాల్డ్ ట్రంప్. కరోనా వైరస్ వుహాన్ ల్యాబ్ నుంచే వచ్చిందని తాను ముందే చెప్పానని అన్నారు. ప్రపంచాన్ని గడగడలాడిస్తున్న వైరస్ పుట్టుక గురించి తాను చెప్పిందే నిజమైందంటున్నారు అన్నారు. చైనాలోని వుహాన్ ల్యాబ్లోనే ఈ వైరస్ను సృష్టించారంటూ ఇటీవల పలు అధ్యయనాలు పేర్కొంటున్న విషయం తెలిసిందే.
ఈ పరిశోధనలపై స్పందించిన ట్రంప్.. తాజాగా ఈ ప్రకటన విడుదల చేశారు. ప్రపంచం మొత్తాన్ని వణికిస్తున్న వైరస్ జాడ చైనాలోనే ఉందని.. యావత్ ప్రపంచానికి చైనా భారీ మూల్యం చెల్లించాలని మండిపడ్డారు.
కరోనా మహమ్మారి ప్రపంచాన్ని చుట్టుముట్టి ఏడాది గడిచినా ఇంకా దాని జన్మస్థలంపై ఇప్పటికీ ఎలాంటి స్పష్టత లేదు. ఈ వైరస్ను చైనానే సృష్టించిందని, ఇది కుంగ్ ఫూ వైరస్ అని ట్రంప్ గతేడాదే ప్రకటించారు. అయితే ఆయన ఆరోపణలకు ఆధారాలు లేవని శాస్త్రవేత్తలతో పాటు అమెరికా గూఢఛారి సంస్థలు అప్పట్లో వాదించాయి.
ఈ విషయం తాత్కాలికంగా మరుగున పడినా.. ఇటీవల మళ్లీ చైనా కుట్రకోణం తెరపైకి వచ్చింది. ఈ వైరస్ చైనా సృష్టే అని, జీవాయుధంగా మార్చేందుకు డ్రాగన్ చేసిన పరిశోధనల ఫలితమే ఈ కోవిడ్ విలయమని ఇటీవల బ్రిటన్ సహా పలు దేశాలు చేసిన పరిశోధనల్లో తేలింది.
