పశ్చిమ బెంగాల్ ప్రభుత్వం ప్రభుత్వ పాఠశాలలు, గుర్తింపు పొందిన మదర్సాల్లో ఉదయం అసెంబ్లీల సందర్భంగా ‘వందేమాతరం’లోని అన్ని చరణాలను పఠించడాన్ని తప్పనిసరి చేస్తూ జారీ చేసిన ఆదేశాలపై అఖిల భారత ముస్లిం వ్యక్తిగత చట్టాల బోర్డు (AIMPLB) అభ్యంతరం వ్యక్తం చేసింది.
బోర్డు ప్రతినిధి ఎస్.క్యూ.ఆర్. ఇలియాస్ ఈ నిర్ణయం రాజ్యాంగ హక్కులకు విరుద్ధమని పేర్కొంటూ, నోటిఫికేషన్ను ఉపసంహరించుకోవాలని లేదా ముస్లిం విద్యార్థులకు మినహాయింపు కల్పించాలని డిమాండ్ చేశారు.
అయితే, ‘వందేమాతరం’ భారత స్వాతంత్య్రోద్యమంలో కీలక పాత్ర పోషించిన జాతీయ గీతంగా చరిత్రలో ప్రత్యేక స్థానం సంపాదించుకుంది. స్వాతంత్య్ర సమరయోధులకు స్ఫూర్తినిచ్చిన ఈ గీతం దేశభక్తి, మాతృభూమి పట్ల అంకితభావానికి ప్రతీకగా పరిగణించబడుతోంది.
పలు జాతీయవాద, సాంస్కృతిక సంస్థలు ‘వందేమాతరం’ పఠనాన్ని వ్యతిరేకించడం దేశ చరిత్ర, స్వాతంత్య్ర పోరాట వారసత్వంపై అనవసర వివాదాలను సృష్టిస్తోందని అభిప్రాయపడుతున్నాయి. దేశ ఐక్యతను బలోపేతం చేసే చిహ్నాల విషయంలో విభేదాల కంటే సమన్వయం అవసరమని వారు పేర్కొంటున్నారు.
ఈ అంశంపై బెంగాల్ ప్రభుత్వం, AIMPLB మధ్య భిన్నాభిప్రాయాలు వ్యక్తమవుతుండగా, జాతీయ చిహ్నాల గౌరవం మరియు సమతుల్యతపై చర్చ కొనసాగుతోంది.
