దేవాలయాల నుంచి వచ్చే ఆదాయాన్ని ఊటీలో రిసార్టులు కట్టకూడదని మద్రాసు హైకోర్టు ఆదేశించింది. పొల్లాచ్చి ఆలయంలోని మిగులు ఆదాయం నుంచి 14 కోట్లతో ఊటీ రిసార్టు కట్టాలని తమిళనాడు ప్రభుత్వం నిర్ణయం తీసుకుంది. దీనిని వ్యతిరేకిస్తూ హైకోర్టులో పిటిషన్ దాఖలైంది. ఈ పిటిషన్ పై విచారణ జరిపిన మద్రాసు హైకోర్టు… దేవాలయాల నుంచి వచ్చే ఆదాయాన్ని HR&CE చట్టంలో చెప్పిన అవసరాల కోసం మాత్రమే వినియోగించాలని, రిసార్టులు కట్టడానికి కాదని తేల్చి చెప్పింది.
మసానీ అమ్మ దేవాలయంలో కోయంబత్తూరులోని పొల్లాచ్చి ప్రాంతంలో వుందని, ఈ దేవాలయం HRCE శాఖ ఆధ్వర్యంలో నడుస్తోందన్నారు. ఈ దేవాలయానికి చాలా మంది భక్తులు వస్తుంటారని, అలాగే 100 కోట్ల ఫిక్స్ డ్ డిపాజిట్లు ఈ దేవాలయానికి వున్నాయని పిటిషనర్ భాస్కర్ కోర్టుకు తెలిపారు.భక్తులు భూములు, ధనాన్ని దేవుడి కోసం ఇచ్చారని, వీటిని ధార్మిక కార్యక్రమాలు, సేవా కార్యక్రమాల కోసం వినియోగించడానికి ఇచ్చారన్నారు .శ్రీరంగం దేవాలయానికి సంబంధించిన చెట్టియార్ కేసులో కూడా ఇలాగే జరిగితే.. సుప్రీంకోర్టు ఓ తీర్పుచ్చిందని, అదే తీర్పును ఈ కేసులో కూడా అన్వయించుకోవచ్చని పేర్కొన్నారు.
భక్తుల ఆక్షేపణలు ఏమాత్రం తెలుసుకోకుండా, పరిగణనలోకి తీసుకోకుండా ఫిక్స్ డ్ డిపాజిట్లని బ్రేక్ చేయకూడదని, ఈ ఆర్డరును నిలిపేస్తూ మధ్యంతర ఉత్తర్వులైనా ఇవ్వాలని, లేదంటే ఆర్డర్ ని వెనక్కి తీసుకోవాలని కోరారు.
అయితే.. ఈ క్రమంలో దేవాలయ ఆదాయంతో ప్రభుత్వం రిసార్టులు నిర్మించాలన్న నిర్ణయాన్ని వెనక్కి తీసుకుంది. ఈ విషయాన్ని కోర్టుకు కూడా తెలిపింది.
