దేశంలో సమాన పౌర స్మృతి (యూనిఫాం సివిల్ కోడ్ – UCC) అమలు దిశగా ప్రతిపాదిత చర్యలు వేగవంతమవుతున్నాయి. ఉత్తరాఖండ్, గుజరాత్, అసోం, మధ్యప్రదేశ్ రాష్ట్రాల బాటలోనే ఇప్పుడు ఛత్తీస్గఢ్ ప్రభుత్వం కూడా రాష్ట్రంలో యుసిసిని తీసుకురావడానికి సన్నాహాలను ముమ్మరం చేసింది. వచ్చే అసెంబ్లీ శీతాకాల సమావేశాల్లోనే యుసిసి బిల్లును సభ ముందుకు తీసుకురావడానికి అవసరమైన అన్ని చట్టపరమైన, పరిపాలనాపరమైన ఏర్పాట్లను వేగంగా పూర్తి చేస్తున్నట్లు రాష్ట్ర ముఖ్యమంత్రి విష్ణు దేవ్ సాయి స్పష్టం చేశారు.
ఛత్తీస్గఢ్లో యుసిసి అమలు సాధ్యాసాధ్యాలను పరిశీలించి, ముసాయిదా చట్టాన్ని రూపొందించడానికి సుప్రీంకోర్టు విశ్రాంత న్యాయమూర్తి జస్టిస్ రంజనా ప్రకాష్ దేశాయ్ నాయకత్వంలో ఐదుగురు సభ్యుల ఉన్నత స్థాయి నిపుణుల కమిటీని ప్రభుత్వం ఇప్పటికే ఏర్పాటు చేసింది. ఈ కమిటీ నిర్వహించిన తొలి కీలక సమావేశంలో డ్రాఫ్టింగ్ ప్రక్రియపై విస్తృతంగా చర్చించారు. చట్ట రూపకల్పనలో ప్రజా భాగస్వామ్యాన్ని ప్రోత్సహించడానికి ప్రత్యేక వెబ్సైట్ ద్వారా పౌరులు, సామాజిక వేత్తలు, చట్ట నిపుణుల నుండి అభిప్రాయాలు, సలహాలు స్వీకరించాలని కమిటీ నిర్ణయించింది.
యుసిసి అమలులోకి వస్తే వివాహం, విడాకులు, దత్తత, ఆస్తి హక్కుల వంటి పౌర వ్యవహారాల్లో మతాలకు అతీతంగా అందరికీ ఒకే రకమైన చట్టాలు వర్తిస్తాయి. అయితే రాష్ట్రంలో గిరిజన జనాభా ఎక్కువగా ఉన్న నేపథ్యంలో, వారి ప్రత్యేక సంస్కృతి, ఆచారాలు, రాజ్యాంగబద్ధ హక్కులకు ఎలాంటి భంగం కలగకుండా తగిన చర్యలు తీసుకుంటామని ప్రభుత్వం హామీ ఇచ్చింది. ప్రతిపక్షాల ఆరోపణలను తిరస్కరిస్తూ, సమాజంలో లింగ సమానత్వాన్ని తీసుకురావడానికి, చట్టపరమైన సంక్లిష్టతలను తగ్గించడానికే ఈ చట్టాన్ని తెస్తున్నట్లు ప్రభుత్వం పేర్కొంది
