ఆధ్యాత్మిక నగరి అయోధ్యలోని రామ మందిరానికి అల్లంత దూరాన రామ జన్మభూమి న్యాస్ నిర్వహిస్తున్న ‘కార్యశాల’కు కేంద్రమైన కరసేవక్పురం గత నాలుగేళ్లుగా అందరి దృష్టిని ఆకర్షిస్తోంది. రామమందిర నిర్మాణానికి అనుకూలంగా 2019లో సుప్రీంకోర్టు వెలువరించిన చారిత్రక తీర్పుతో ఈ కార్యశాల ప్రాధాన్యం మరింత పెరిగింది. ఆలయ నిర్మాణంలో వాడుతున్న స్తంభాలు, రాళ్లకు ఇక్కడ మెరుగులు దిద్దుతున్నారు. 30 ఏళ్లకు పైగా నిర్వహిస్తున్న ఈ కార్యశాలను సందర్శించే పర్యాటకుల సంఖ్య గత నాలుగేళ్లుగా బాగా పెరిగింది. ఉదయం 8.00 నుంచి సాయంత్రం 5.00 గంటల దాకా స్థానిక మహిళలు ఇక్కడ నగిషీ పనుల్లో పాల్గొంటున్నారు. ఈ మహిళలు శ్రీరాముడి సేవలో రోజూ కొంత అదనపు సమయం పనిచేస్తున్నారు. అందంగా చెక్కిన రాళ్ల ఉపరితలం మీద ఏర్పడిన నల్లటి మచ్చలను వీరు ఐరన్ బ్లేడుతో అంగుళం అంగుళం తొలగిస్తున్నారు. ఈ మహిళలకు రూ.12 వేల నెలజీతం ఇస్తున్నారు. రాజస్థాన్లోని సోమ్పురా నుంచి వచ్చిన పురుష కార్మికులు కూడా పనిచేస్తున్నారు.
