-
‘ఆత్మనిర్భర భారత్’ లబ్ధిదారులతో ప్రధాని మోదీ
న్యూఢిల్లీ: గోవా ప్రభుత్వం తీసుకొచ్చిన స్వయంపూర్ణ అనే పథకం మహిళాసాధికారతకు కృషి చేస్తుంది… కేంద్రలో, రాష్ట్రంలో ఒకే పార్టీ ప్రభుత్వం ఉంది. దీంతో గోవాలో అభివృద్ధి డబుల్ ఇంజన్ రైలు వేగంతో పరుగులు పెడుతోంది… కేంద్ర ప్రభుత్వం తీసుకొచ్చిన ప్రతీ పథకం గోవాలో అమల్లో ఉంది… దేశంలోని అన్ని రాష్ట్రాల్లో పోల్చితే అభివృద్ధికి చిరునామాగా నిలుస్తోంది. దేశ పర్యటక రంగంలో గోవా ప్రముఖ పాత్ర పోషిస్తోంది. అంతేగాకుండా.. సహజ సిద్ధంగా ఏర్పడిన మౌలిక సదుపాయాలు రైతులకు, పశుపోషకులకు, మత్స్యకారులకు సరిపడా ఆదాయాన్ని సమకూర్చుతున్నాయి. గోవాలో ఈ ఏడాది గ్రామీణ మౌలిక సదుపాయాల ఆధునీకరణ కోసం నిధులను ఐదు రెట్లు పెంచామని ప్రధాని నరేంద్ర మోదీ అన్నారు. గోవాలోని ఆత్మనిర్భర భారత్ లబ్ధిదారులతో ప్రధాని శనివారం సమావేశమయ్యారు.
కేంద్రం సహకారంతో గోవా ప్రభుత్వం నిర్వహిస్తున్న ‘ఆత్మనిర్భర భారత్ స్వయంపూర్ణ గోవా’ అనే కార్యక్రమం ద్వారా లబ్ధి పొందిన వారితో వర్చువల్గా మాట్లాడారు మోదీ. ఈ కార్యక్రమంలో గోవా ముఖ్యమంత్రి ప్రమోద్ సావంత్, సంబంధిత అధికారులు పాల్గొన్నారు. స్వయంపూర్ణ గోవా అనే కార్యక్రమాన్ని అక్కడి ప్రభుత్వం అక్టోబర్ 1, 2020న ప్రారంభించింది. ఈ కార్యక్రమానికి రాష్ట్ర ప్రభుత్వం.. స్వయంపూర్ణ అనే పేరుతో ఓ ప్రత్యేకాధికారిని నియమించింది. ఇతను క్షేత్రస్థాయిలో పర్యటించి రాష్ట్రప్రభుత్వం అందిస్తున్న వివిధ పథకాల గురించి వివరిస్తారు.
Source: EtvBharat
