సంస్కృత విద్యార్థులకు ఆయుర్వేదంలో కొత్త అవకాశం

న్యూఢిల్లీ: భారత ప్రాచీన విజ్ఞాన సంపదను ఆధునిక విద్యా విధానంతో అనుసంధానించే దిశగా సెంట్రల్ సంస్కృత యూనివర్సిటీ (CSU) కీలక నిర్ణయం తీసుకుంది. 2026–27 విద్యా సంవత్సరం నుంచి ‘నేషనల్ ఎలిజిబిలిటీ-కమ్-ఎంట్రన్స్ టెస్ట్ ప్రీ-ఆయుర్వేద’ (NEET-PA) ప్రవేశ పరీక్షను ప్రారంభించనున్నట్లు ప్రకటించింది.

ఆయుర్వేద వైద్య రంగంలోకి రావాలనే ఆసక్తి ఉన్న సంస్కృత విద్యార్థులకు ఈ కార్యక్రమం కొత్త మార్గాన్ని అందించనుంది. సంస్కృత బోర్డులతో పాటు గుర్తింపు పొందిన ఏ బోర్డు నుంచైనా 10వ తరగతి ఉత్తీర్ణులైన విద్యార్థులు ఈ కోర్సులో ప్రవేశం పొందేందుకు అర్హులని యూనివర్సిటీ వెల్లడించింది.

ఈ కార్యక్రమానికి నేషనల్ కమిషన్ ఫర్ ఇండియన్ సిస్టమ్ ఆఫ్ మెడిసిన్ (NCISM) ఆమోదం తెలిపింది. జాతీయ విద్యా విధానం (NEP) 2020 లక్ష్యాలకు అనుగుణంగా సంస్కృత విద్య, గురుకుల సంప్రదాయం, భారతీయ ఆయుర్వేద జ్ఞాన వ్యవస్థలను ఒకే విద్యా చట్రంలోకి తీసుకురావడమే ఈ కార్యక్రమం ఉద్దేశమని అధికారులు తెలిపారు.

NEET-PA ద్వారా ఎంపికైన విద్యార్థులు సెంట్రల్ సంస్కృత యూనివర్సిటీకి అనుబంధంగా ఉన్న ప్రీ-ఆయుర్వేద గురుకులాల్లో ప్రవేశం పొంది, అనంతరం బ్యాచిలర్ ఆఫ్ ఆయుర్వేదిక్ మెడిసిన్ అండ్ సర్జరీ (BAMS) విద్యను అభ్యసించవచ్చు.

ఈ సమగ్ర కోర్సు మొత్తం కాలవ్యవధి 7.5 సంవత్సరాలు ఉంటుంది. ఇందులో రెండేళ్ల ప్రీ-ఆయుర్వేద అధ్యయనం, 4.5 ఏళ్ల BAMS కోర్సు, ఒక సంవత్సరం తప్పనిసరి ఇంటర్న్‌షిప్ ఉంటాయి. కోర్సు పూర్తిచేసిన అనంతరం విద్యార్థులు ఆయుర్వేద వైద్యులుగా ప్రాక్టీస్ చేయడానికి అర్హత పొందుతారు.

సెంట్రల్ సంస్కృత యూనివర్సిటీ వైస్ ఛాన్సలర్ ప్రొఫెసర్ శ్రీనివాస్ వర్ఖేడీ మాట్లాడుతూ, ఈ కార్యక్రమం సంస్కృత విద్య, గురుకుల సంప్రదాయం, ఆయుర్వేదాన్ని ఒకే వేదికపైకి తీసుకువస్తుందని తెలిపారు. భారతదేశ ప్రాచీన జ్ఞాన వారసత్వాన్ని పరిరక్షించడంతో పాటు, విద్యార్థులు తమ సంప్రదాయ విద్యను వృత్తి జీవితంగా మార్చుకునేందుకు ఈ చొరవ ఉపయోగపడుతుందని పేర్కొన్నారు.

NEET-PA దరఖాస్తుల ప్రక్రియ 2026 జూలై మూడో వారంలో ప్రారంభమయ్యే అవకాశం ఉందని యూనివర్సిటీ తెలిపింది. దరఖాస్తుదారుల వయస్సు 2026 డిసెంబర్ 31 నాటికి కనీసం 15 సంవత్సరాలు ఉండాలి. గరిష్ఠ వయస్సు 25 సంవత్సరాలు మించకూడదు.

ప్రవేశ పరీక్ష ఆఫ్‌లైన్ విధానంలో (OMR ఆధారితంగా) నిర్వహించనున్నారు. పరీక్షలో మొత్తం 120 బహుళ ఎంపిక ప్రశ్నలు ఉంటాయి. పరీక్ష సమయం 150 నిమిషాలు కాగా, ఇందులో నెగటివ్ మార్కింగ్ విధానం ఉండదు. అభ్యర్థులు సంస్కృతం, హిందీ లేదా ఆంగ్ల భాషల్లో పరీక్ష రాసే అవకాశం ఉంటుంది.

ఈ కార్యక్రమం ద్వారా భారతీయ సంప్రదాయ విజ్ఞానం, ఆధునిక వైద్య విద్య మధ్య వారధి ఏర్పడి, ఆయుర్వేద రంగంలో కొత్త తరం నిపుణులు తయారవుతారని అధికారులు ఆశాభావం వ్యక్తం చేశారు.