బంగ్లాదేశ్లోని గైబంధా ప్రాంతంలో హిందూ దేవాలయ నిర్మాణ ప్రాజెక్టును లక్ష్యంగా చేసుకుని ఇస్లామిక్ మౌలికవాదులు, జిహాదీ వర్గాలు గందరగోళం సృష్టిస్తున్నాయని, ఈ పరిణామాలపై ప్రభుత్వం మౌనంగా ఉండటం ఆందోళన కలిగిస్తోందని వీక్లీ బ్లిట్జ్ సీనియర్ ఎడిటర్, మైనారిటీ హిందువుల హక్కుల పరిరక్షకుడు సలాహ్ ఉద్దీన్ షోయబ్ చౌధురి వ్యాఖ్యానించారు. ఈ అంశంపై ఆయన సామాజిక మాధ్యమ వేదిక Xలో ఒక వీడియోను విడుదల చేస్తూ పలు ప్రశ్నలను లేవనెత్తారు.
గైబంధాలో నిర్మాణంలో ఉన్న హిందూ ధార్మిక ప్రాజెక్టును వ్యతిరేకిస్తూ కొందరు వర్గాలు శివుడు, శ్రీకృష్ణుడు, శ్రీరాముల విగ్రహాలను తొలగించాలని బహిరంగంగా డిమాండ్ చేస్తున్నప్పటికీ ప్రభుత్వ యంత్రాంగం స్పందించకపోవడం విచారకరమని ఆయన పేర్కొన్నారు. బంగ్లాదేశ్లో నివసిస్తున్న హిందువులకు సమాన హక్కులు లేవా? దేశాన్ని “హిందూ రహిత” ప్రాంతంగా మార్చాలనే ప్రయత్నాలకు ప్రభుత్వం పరోక్షంగా సహకరిస్తోందా? అని ప్రశ్నించారు.
ముస్లిం దేశాల నుంచి వందలాది మసీదుల నిర్మాణానికి భారీ నిధులు వస్తున్నాయని, క్రైస్తవ మిషనరీలు చర్చిల నిర్మాణానికి సహాయం చేస్తున్నాయని, జపాన్ బౌద్ధ పగోడాల నిర్మాణానికి మద్దతు ఇస్తోందని ఆయన గుర్తు చేశారు. అయితే హిందువులు దేవాలయాలు నిర్మించాలనుకున్నప్పుడు లేదా విగ్రహాలను ప్రతిష్ఠించాలనుకున్నప్పుడు మాత్రమే అభ్యంతరాలు వ్యక్తం కావడం వెనుక హిందువులపై ద్వేషాన్ని రెచ్చగొట్టే శక్తులు పనిచేస్తున్నాయని ఆరోపించారు.
బంగ్లాదేశ్లో హిందువులపై పెరుగుతున్న ఒత్తిళ్లు, వివక్షను ప్రపంచ మానవ హక్కుల సంస్థలు, అంతర్జాతీయ మీడియా, ప్రజాస్వామ్యవాదులు, విధాన నిర్ణేతలు గమనించి స్పందించాలని చౌధురి విజ్ఞప్తి చేశారు. హిందూ మైనారిటీల హక్కులను రక్షించేలా బంగ్లాదేశ్ ప్రభుత్వంపై అంతర్జాతీయ ఒత్తిడి తీసుకురావాలని కోరారు.
గైబంధా హిందూ ధార్మిక ప్రాజెక్టు నిరాటంకంగా కొనసాగాలని, దీనిని అడ్డుకోవడానికి కుట్రలు జరుగుతున్నాయని ఆయన ఆరోపించారు. గతంలో చిన్మయ్ కృష్ణ దాస్పై జరిగిన చర్యల మాదిరిగానే, ప్రాజెక్టు నిర్వాహకులపై తప్పుడు ఆరోపణలు మోపి వారిని ఇబ్బందులకు గురిచేసే ప్రయత్నాలు జరుగుతున్నాయని పేర్కొన్నారు. చిన్మయ్ కృష్ణ దాస్ను వెంటనే విడుదల చేయాలని, గైబంధా ప్రాజెక్టుకు సంపూర్ణ రక్షణ కల్పించాలని డిమాండ్ చేశారు.
బంగ్లాదేశ్ ప్రభుత్వం విదేశీ ప్రభావాలకు లేదా మత మౌలికవాద ఒత్తిళ్లకు లొంగకుండా దేశంలోని లౌకిక విలువలు, మత సామరస్యాన్ని కాపాడాలని చౌధురి సూచించారు. హిందువుల హక్కుల పరిరక్షణ కేవలం ఒక మతానికి సంబంధించిన అంశం కాదని, అది బంగ్లాదేశ్ ప్రజాస్వామ్య, లౌకిక స్వరూపానికి సంబంధించిన పరీక్ష అని ఆయన పేర్కొన్నారు. బంగ్లాదేశ్ మరో పాకిస్థాన్గా మారకూడదని, అన్ని మతాల ప్రజలు సమాన గౌరవంతో జీవించే దేశంగా నిలవాలని ఆయన ఆకాంక్షించారు.
