బనారస్ హిందూ విశ్వవిద్యాలయంలో నిర్వహించిన ఎం.ఏ. చరిత్ర నాలుగో సెమిస్టర్ పరీక్షలో అడిగిన ఒక ప్రశ్న వివాదానికి దారితీసింది. ముఖ్యంగా బ్రాహ్మణ సమాజాన్ని ప్రస్తావిస్తూ వచ్చిన ప్రశ్నపై విద్యార్థుల్లో తీవ్ర అభ్యంతరాలు వ్యక్తమయ్యాయి. ఈ నేపథ్యంలో అఖిల్ భారతీయ విద్యార్థి పరిషత్ (ఏబీవీపీ)కు చెందిన విద్యార్థులు విశ్వవిద్యాలయం చరిత్ర విభాగం ఎదుట నిరసన కార్యక్రమం చేపట్టారు.
“ఆధునిక భారత చరిత్రలో మహిళలు” అనే అంశానికి సంబంధించిన ప్రశ్నపత్రంలో, “ప్రాచీన భారతదేశంలో ‘బ్రాహ్మణీయ పితృస్వామ్య’ వ్యవస్థ మహిళల పురోగతిని ఎలా అడ్డుకుంది?” అనే ప్రశ్నను అడిగారు. ఈ ప్రశ్న హిందూ సమాజ భావోద్వేగాలను దెబ్బతీసేలా ఉందని ఏబీవీపీ నేతలు ఆరోపించారు.
ఈ ప్రశ్నపత్రాన్ని చరిత్ర విభాగానికి చెందిన ప్రొఫెసర్ సుతపా దాస్ రూపొందించినట్లు సమాచారం. అయితే వివాదం చెలరేగిన అనంతరం కూడా ఆమె ఈ అంశంపై ఇప్పటివరకు ఎలాంటి అధికారిక ప్రకటన చేయలేదు.
విద్యార్థి సంఘాల డిమాండ్ మేరకు ఈ అంశంపై సమగ్ర విచారణ జరిపి, బాధ్యులపై చర్యలు తీసుకోవాలని విశ్వవిద్యాలయ యాజమాన్యాన్ని కోరారు. భవిష్యత్తులో పరీక్షలలో ఇలాంటి పక్షపాత ధోరణి కనిపించకుండా జాగ్రత్తలు తీసుకోవాలని కూడా వారు డిమాండ్ చేశారు.
ఇదిలా ఉండగా, విశ్వవిద్యాలయ వర్గాలు స్పందిస్తూ “బ్రాహ్మణీయ పితృస్వామ్యం” అనే అంశం నిర్దేశిత సిలబస్లో భాగమేనని పేర్కొన్నాయి. చరిత్ర విద్యార్థుల్లో విశ్లేషణాత్మక దృష్టి, భిన్న అభిప్రాయాలపై అవగాహన పెంపొందించేందుకు ఇటువంటి అంశాలను బోధిస్తామని యాజమాన్యం వివరణ ఇచ్చింది. విద్యా రంగంలో భిన్నాభిప్రాయాలు, చర్చలు సహజమని కూడా స్పష్టం చేసింది.
ఈ ఘటన ప్రస్తుతం విద్యా వర్గాలు, విద్యార్థి సంఘాలు, సామాజిక వర్గాల్లో చర్చనీయాంశంగా మారింది.
