సింహాచలం శ్రీ వరాహ లక్ష్మీనృసింహస్వామివారి వార్షిక చందనోత్సవాన్ని ఏప్రిల్ 20వ తేదీన అన్ని శాఖల సమన్వయంతో అత్యంత వైభవంగా నిర్వహిస్తామని దేవస్థానం ఈవో జె.వెంకటరావు తెలిపారు. సింహగిరిపై వివిధ శాఖల అధికారులతో ఆయన సమీక్షా సమావేశం నిర్వహించారు. ఈ సందర్భంగా ఆయన మాట్లాడుతూ భక్తులకు ఎలాంటి ఇబ్బందులు కలగకుండా స్వామివారి నిజరూప దర్శనం కల్పించడమే ప్రధాన ధ్యేయంగా ఏర్పాట్లు చేస్తున్నట్లు పేర్కొన్నారు. సరికొత్త సాంకేతికతను జోడించి ఈసారి ఏర్పాట్లు చేపడుతున్నామన్నారు. ఉత్సవం రోజున ఉదయం 3 నుంచి సాయంత్రం 5 గంటల వరకు భక్తులకు నిజరూప దర్శనం ఉంటుందని, అయితే అంతరాలయ దర్శనాలను పూర్తిగా రద్దు చేసినట్లు స్పష్టం చేశారు.
సాంకేతికతతో టికెట్ల జారీ
ఎలాంటి సిఫార్సులకు తావులేకుండా పారదర్శకత కోసం రూ.1500 టికెట్లను ఐటీ విభాగం సహకారంతో బ్యాంకుల ద్వారా మొబైల్ నంబర్లను అనుసంధానించి జారీ చేయనున్నారు. క్యూలైన్ల ప్రవేశ ద్వారం వద్ద టికెట్పై ఉన్న క్యూఆర్ కోడ్ను స్కాన్ చేసిన తర్వాతే భక్తులను అనుమతిస్తారు. ఈసారి ఐదు వరుసల్లో క్యూలైన్లను ఏర్పాటు చేస్తున్నామని, భద్రత దృష్ట్యా ప్రతి 100 మీటర్లకు ఒక అత్యవసర నిష్క్రమణ ద్వారం ఉంటుందని వెల్లడించారు.
భక్తుల సౌకర్యార్థం ప్రత్యేక చర్యలు
దివ్యాంగులు, వృద్ధులకు: వీరికి ప్రత్యేక టైమ్ స్లాట్ కేటాయించి, ప్రత్యేక క్యూలైన్, లిఫ్టు, రవాణా సౌకర్యాలు కల్పిస్తారు.
వసతులు: కొండపైన, దిగువన లైటింగ్, ఫ్యాన్లు, మొబైల్ మరుగుదొడ్లు పూర్తిస్థాయిలో అందుబాటులో ఉంచుతారు.
వైద్యం: అత్యవసర చికిత్స కోసం కొండపై 6 పడకల వైద్య శిబిరాన్ని ఏర్పాటు చేస్తున్నారు.
వలంటీర్లు: మూడు రంగుల ఐడీ కార్డులతో కూడిన వలంటీర్లు భక్తులకు సేవలు అందిస్తారు. వీరిని అసిస్టెంట్ కమిషనర్ స్థాయి అధికారి పర్యవేక్షిస్తారు.
గడువులోగా పనులు పూర్తి
సివిల్ పనులన్నీ మార్చి నెలాఖరుకు, చందనోత్సవ తుది ఏర్పాట్లు ఏప్రిల్ 17 నాటికీ పూర్తి చేయాలని ఇంజనీరింగ్ అధికారులను ఈవో ఆదేశించారు. రవాణా సౌకర్యం కోసం ఆర్టీసీ బస్సుల ఫిట్నెస్ను తనిఖీ చేయాలని సూచించారు. భారీ పోలీస్ బందోబస్తుతో పాటు ప్రతి పాయింట్ వద్ద పర్యవేక్షకులను నియమించనున్నట్లు తెలిపారు.
