472views
చైనా తన ఖండాంతర బాలిస్టిక్ క్షిపణులను దాచి ఉంచేందుకు వీలుగా కొత్తగా 119 టవర్ల వంటి నిర్మాణాలను (సిలోలు) ఏర్పాటు చేసుకుంటోంది. బీజింగ్ కు దాదాపు 2,100 కిలోమీటర్ల దూరంలో, గాన్సూ ప్రావిన్సులోని ఓ ఎడారిలో వాటన్నింటినీ ఒకే ఆకృతిలో నిర్మిస్తున్నట్లు ఉపగ్రహ ఛాయాచిత్రాల ద్వారా స్పష్టమవుతోందని అమెరికాకు చెందిన ‘వాషింగ్టన్ పోస్ట్’ వార్తాసంస్థ ఓ కథనంలో వెల్లడించింది.
భారత్ సహా, అమెరికా ప్రధాన భూభాగాలను తాకగల శక్తిమంతమైన ఆయుధాలను ఈ టవర్లలో ఉంచే అవకాశముందని ‘వాషింగ్టన్ పోస్ట్’ తెలిపింది. డ్రాగన్ వద్ద ఇప్పటికే 250-350 అణ్వాయుధాలు ఉన్నట్లు అంచనాలున్నట్లు గుర్తుచేసింది. కొత్తగా ఎన్ని క్షిపణులను సమకూర్చుకొని.. ప్రస్తుతం నిర్మిస్తున్న టవర్లలో భద్రపరుస్తుందన్న దానిపై స్పష్టత లేదని పేర్కొంది.
