అస్సాం పాఠశాలలో బీఫ్ వివాదం.. ఐదుగురు విద్యార్థుల బహిష్కరణ

అస్సాంలోని గోల్‌పారా జిల్లాలో ఒక ప్రభుత్వ పాఠశాలలో టిఫిన్ బాక్స్‌లో బీఫ్ తీసుకువచ్చిన ఘటన వివాదాస్పదంగా మారింది.** సహ విద్యార్థులకు ఆ ఆహారాన్ని తినిపించేందుకు ప్రయత్నించారనే ఆరోపణల నేపథ్యంలో ఐదుగురు ముస్లిం విద్యార్థులపై చర్యలు తీసుకునేందుకు పాఠశాల యాజమాన్యం సిద్ధమైంది. ఈ ఘటన స్థానికంగా మతపరమైన ఉద్రిక్తతలకు దారితీయడంతో జిల్లా యంత్రాంగం జోక్యం చేసుకుంది.

విశ్వాసాలను దెబ్బతీశారంటూ ఫిర్యాదు
కృష్ణాయ్ పోలీస్ స్టేషన్ పరిధిలోని ప్రభుత్వ హయ్యర్ సెకండరీ పాఠశాలలో తొమ్మిదో తరగతి చదువుతున్న ఐదుగురు విద్యార్థులు జూన్ 5న తమ టిఫిన్ బాక్స్‌లో తీసుకువచ్చిన బీఫ్‌ను ఇద్దరు హిందూ విద్యార్థులకు తినిపించేందుకు ప్రయత్నించారనే ఆరోపణలు వెలువడ్డాయి. దీనిపై హిందూ విద్యార్థుల తల్లిదండ్రులు ఫిర్యాదు చేయడంతో పోలీసులు కేసు నమోదు చేశారు.

ఈ వ్యవహారంలో టిఫిన్ తీసుకువచ్చిన మైనర్ బాలుడిని జువైనల్ కోర్టు ముందు హాజరుపరచగా, అతని తల్లిని పోలీసులు అరెస్ట్ చేసినట్లు సమాచారం. మిగిలిన నలుగురు విద్యార్థులను అధికారులు విచారిస్తున్నారు.

ప్రారంభంలో ఈ సమస్యను పాఠశాల స్థాయిలోనే పరిష్కరించాలని ఉపాధ్యాయులు భావించినప్పటికీ, విషయం గ్రామంలో వ్యాపించడంతో స్థానిక ప్రజలు, పలు సంస్థలు పాఠశాల వద్ద నిరసనలకు దిగాయి. దీంతో పరిస్థితి ఉద్రిక్తంగా మారింది.స్కూల్ మేనేజ్‌మెంట్ డెవలప్‌మెంట్ కమిటీ అధ్యక్షుడు సుబ్రతా దాస్ మాట్లాడుతూ, ఐదుగురు విద్యార్థులను పాఠశాల నుండి శాశ్వతంగా బహిష్కరించాలనే ప్రతిపాదనపై మంగళవారం జరిగే ప్రత్యేక సమావేశంలో తుది నిర్ణయం తీసుకోనున్నట్లు తెలిపారు. కమిటీలోని మెజారిటీ సభ్యులు బహిష్కరణకు అనుకూలంగా ఉన్నట్లు ఆయన పేర్కొన్నారు.

పాఠశాలల్లో మాంసాహారంపై ఆంక్షలు
ఘటన అనంతరం జిల్లా కలెక్టర్ ప్రదీప్ తిముంగ్, ఎస్ఎస్పీ నవనీత్ మహంత పాఠశాలను సందర్శించి పరిస్థితిని సమీక్షించారు. భవిష్యత్తులో ఇలాంటి వివాదాలు తలెత్తకుండా విద్యార్థుల టిఫిన్ బాక్సులను తనిఖీ చేయాలని అధికారులను ఆదేశించారు.

అదేవిధంగా, పాఠశాలలకు విద్యార్థులు కోడిగుడ్లు మాత్రమే తీసుకురావాలని, చికెన్, మటన్, చేపలు తదితర మాంసాహార పదార్థాలను తీసుకురావడాన్ని నిషేధిస్తున్నట్లు జిల్లా యంత్రాంగం ప్రకటించింది. ఘటనపై మెజిస్టీరియల్ విచారణకు కూడా ఆదేశాలు జారీ అయ్యాయి.

విచారణ నివేదిక కోసం ఎదురుచూపులు
ఈ ఘటనకు సంబంధించి ఆరోపణలపై అధికారులు దర్యాప్తు కొనసాగిస్తున్నారు. పూర్తి వివరాలు మెజిస్టీరియల్ విచారణ నివేదిక అనంతరం స్పష్టమయ్యే అవకాశం ఉంది.