చిత్తూరు జిల్లాలో ఆవులు, ఎద్దులను దొంగిలిస్తున్న ఘటనలు తరచుగా వెలుగు చూస్తున్నాయి. తాజాగా జిల్లాలోని గంగవరంలో ఆవులు, ఎద్దులను దొంగిలించారు కొందరు దుండగులు. గాంధీనగర్‌లో 5 ఆవులు, 2 ఎద్దులను దొంగల ముఠా అపహరించుకెళ్లింది. అయితే, ఘటన జరిగిన పశువుల కొట్టంలో కంట్రీ మేడ్ రివాల్వర్ లభ్యమవడంతో గ్రామస్థులు ఉలిక్కిపడ్డారు. దుండగులు ఒకవేళ తాము దొరికితే కంట్రీమేడ్ రివాల్వర్‌తో జనాలను భయపెట్టి తప్పించుకోవచ్చునని భావించినట్లు తెలుస్తోంది. ఈ రివాల్వర్‌ను గమనించిన పోలీసులు.. ఉత్తరాది రాష్ట్రాలకు చెందిన దొంగల ముఠాయే ఈ దోపిడీలకు పాల్పడి ఉండొచ్చని ప్రాథమిక అంచనాకు వచ్చారు.
కాగా, గతంలో తమిళనాడులోని వేలూరు పరిసర ప్రాంతాల్లో ఇలాంటి చోరీలు జరిగివుండడాన్ని పోలీసులు గుర్తించారు. ఆ సమయంలో అడ్డు వచ్చిన వారిపై దాడులుకు పాల్పడ్డట్లు పేర్కొన్నారు. అలా తుపాకులను వెంటబెట్టుకుని గోవుల దొంగతనాలకు పాల్పడటం.. అడ్డుపడితే దాడులకు తెగబడటం చేస్తుంటారని పోలీసులు చెబుతున్నారు. కాగా, ఈ కిరాతక దొంగల ముఠా పట్ల ప్రజలు తీవ్ర భయాందోళనకు గురవుతున్నారు. వారికి సంబంధించిన రివాల్వర్ లభ్యమవడంతో.. ప్రజలు సైతం అప్రమత్తంగా ఉండాలని పోలీసులు సూచిస్తున్నారు. ఇదిలా ఉంటే.. ఆవుల చోరీపై కేసు నమోదు చేసుకున్న పోలీసులు దర్యాప్తు చేస్తున్నారు.
