News

కశ్మీర్‌లో స్థానిక ఉగ్రవాదులు ఒక్కరూ మిగల్లేదు.. అమిత్ షా కీలక ప్రకటన

12views

న్యూఢిల్లీ: జమ్మూకశ్మీర్‌లో స్థానికంగా ఉగ్రవాద కార్యకలాపాలకు పాల్పడుతున్న ఉగ్రవాదులు ప్రస్తుతం ఒక్కరూ మిగలలేదని కేంద్ర హోంమంత్రి అమిత్ షా ప్రకటించారు. లష్కరే తయ్యిబా ఉగ్ర సంస్థకు చెందిన లతీఫ్ భట్‌ను భద్రతా దళాలు ఇటీవల మట్టుబెట్టిన నేపథ్యంలో ఆయన ఈ కీలక వ్యాఖ్యలు చేశారు.

సరిహద్దుకు ఆవల నుంచి ఎదురవుతున్న ఉగ్రవాద ముప్పుపై చర్చించేందుకు నిర్వహించిన రెండు రోజుల సదస్సును ప్రారంభించిన అమిత్ షా ఈ సందర్భంగా ప్రసంగించారు. ఉగ్రవాదంపై భారత్ సాగిస్తున్న పోరాటంలో ఇది కీలక మైలురాయి వంటి పరిణామమని అభివర్ణించారు. ప్రధానమంత్రి నరేంద్ర మోదీ నాయకత్వంలో కేంద్ర ప్రభుత్వం ఉగ్రవాదంపై ఏమాత్రం ఉపేక్షించని ‘జీరో టాలరెన్స్’ విధానాన్ని అనుసరిస్తోందని స్పష్టం చేశారు. దేశ భద్రత విషయంలో రాజీ పడే ప్రసక్తే లేదని ఆయన వ్యాఖ్యల సారాంశం.

విదేశాల్లో దాక్కున్న నేరగాళ్లను భారత్‌కు రప్పించాలి
ఉగ్రవాదం, వ్యవస్థీకృత నేరాలు, మాదకద్రవ్యాల అక్రమ రవాణా వంటి సమస్యలను పూర్తిగా అరికట్టాలంటే విదేశాల్లో తలదాచుకుంటున్న నేరగాళ్లను భారత్‌కు తీసుకురావడం అత్యంత అవసరమని అమిత్ షా పేర్కొన్నారు.

2019 నుంచి ఇప్పటివరకు 36 దేశాల నుంచి 303 మంది పరారీలో ఉన్న ఉగ్రవాదులను భారత్‌కు రప్పించగలిగామని వెల్లడించారు. అంతర్జాతీయ సహకారంతో ఉగ్రవాద నెట్‌వర్క్‌లను ఛేదించేందుకు ప్రభుత్వం కృషి చేస్తోందని తెలిపారు.

ఉగ్రవాద ఆర్థిక మూలాలను దెబ్బతీయాలి
ఉగ్రవాదాన్ని పూర్తిస్థాయిలో నిర్మూలించాలంటే దానికి ఆర్థిక సహాయం అందిస్తున్న నెట్‌వర్క్‌ను సమూలంగా దెబ్బతీయాలని కేంద్ర హోంమంత్రి పిలుపునిచ్చారు. ఉగ్రవాద సంస్థలకు నిధులు సమకూర్చే వ్యవస్థలను గుర్తించి వాటిని అడ్డుకోవడం అత్యంత కీలకమని పేర్కొన్నారు.

దేశంలోని వివిధ రాష్ట్రాల పోలీసులు ఉగ్రవాద నిర్మూలన కోసం కృషి చేస్తున్నప్పటికీ, వారి మధ్య సమన్వయలోపం స్పష్టంగా కనిపిస్తోందని అమిత్ షా అభిప్రాయపడ్డారు. ఉగ్రవాదం, వ్యవస్థీకృత నేరాలు, మాదకద్రవ్యాల అక్రమ రవాణాను ఎదుర్కోవడానికి కేంద్ర, రాష్ట్ర భద్రతా సంస్థల మధ్య మరింత సమన్వయం అవసరమని స్పష్టం చేశారు.