అమెరికాలో హిందూ దేవాలయాల భద్రతను మరింత పటిష్టం చేసేందుకు ట్రంప్ ప్రభుత్వం చర్యలు చేపట్టినట్లు సమాచారం. ఇల్లినాయిస్ రాష్ట్రంలో ఓ హిందూ ఆలయాన్ని లక్ష్యంగా చేసుకుని దాడికి కుట్ర జరిగినట్లు వెలుగులోకి వచ్చిన నేపథ్యంలో, దీపావళి పండుగకు ముందు దేశవ్యాప్తంగా హిందూ దేవాలయాలు, మతపరమైన సంస్థల వద్ద భద్రతను పెంచాలని నిర్ణయించినట్లు తెలుస్తోంది. ఈ క్రమంలో సుమారు 500 దేవాలయాల భద్రత కోసం రూ.100 కోట్లు కేటాయించినట్లు సమాచారం.
భద్రతా చర్యల్లో భాగంగా దేవాలయ ప్రాంగణాల్లో నిరంతరం పర్యవేక్షణ చేపట్టేందుకు సీసీటీవీ కెమెరాలను ఏర్పాటు చేయనున్నారు. అనుమానాస్పద కదలికలను గుర్తించేందుకు నిఘా అలారంలను కూడా అందుబాటులోకి తీసుకురానున్నట్లు సమాచారం. దీనివల్ల ఆలయాల పరిసరాల్లో భద్రతను మరింత సమర్థవంతంగా పర్యవేక్షించే అవకాశం ఉంటుంది.
అత్యధిక సంఖ్యలో భక్తులు సందర్శించే దేవాలయాల వద్ద ప్రత్యేక భద్రతా ఏర్పాట్లు చేయనున్నారు. ఇందులో భాగంగా శిక్షణ పొందిన, లైసెన్సులు కలిగిన సాయుధ భద్రతా సిబ్బందిని నియమించనున్నట్లు తెలుస్తోంది. పండుగల సమయంలో భక్తుల రద్దీ పెరిగే నేపథ్యంలో ఎలాంటి అవాంఛనీయ ఘటనలు చోటుచేసుకోకుండా ముందస్తు జాగ్రత్తలు తీసుకోవడంపై దృష్టి సారించినట్లు సమాచారం.
దీపావళి వంటి ప్రధాన పండుగల సందర్భంగా అమెరికాలోని హిందూ దేవాలయాలకు పెద్ద సంఖ్యలో భక్తులు తరలివస్తారు. ఈ నేపథ్యంలో ఆలయాల భద్రతను బలోపేతం చేయడం, భక్తులకు సురక్షిత వాతావరణాన్ని కల్పించడం లక్ష్యంగా ఈ చర్యలు చేపట్టినట్లు తెలుస్తోంది.
