ఆషాఢ మాసం సందర్భంగా విజయవాడ ఇంద్రకీలాద్రిపై కొలువై ఉన్న శ్రీకనకదుర్గమ్మ అమ్మవారికి తిరువూరు పోలీసులు భక్తిశ్రద్ధలతో సారె సమర్పించారు. ప్రతి సంవత్సరం ఆషాఢ మాసంలో నిర్వహించే సంప్రదాయంలో భాగంగా పోలీసులు ఈ కార్యక్రమాన్ని చేపట్టారు.
తిరువూరు పోలీస్ స్టేషన్ నుంచి మహిళా పోలీసులు సారెను సిద్ధం చేసి ప్రత్యేక వాహనంలో విజయవాడకు తరలించారు. సీఐ గిరిబాబు, ఎస్ఐలు శాతకర్ణి, టి. గౌరీశ్వరి ఆధ్వర్యంలో పోలీసు సిబ్బంది, మహిళా పోలీసులు ఊరేగింపుగా సారెను తీసుకెళ్లారు.
ఇంద్రకీలాద్రికి చేరుకున్న అనంతరం శ్రీకనకదుర్గమ్మ అమ్మవారికి సారెను సమర్పించి ప్రత్యేక పూజలు నిర్వహించారు. అమ్మవారి ఆశీస్సులతో ప్రజలందరూ సుఖసంతోషాలతో, ఆయురారోగ్యాలతో జీవించాలని, శాంతి భద్రతలు మరింత మెరుగుపడాలని పోలీసులు ప్రార్థించారు.
ఈ సందర్భంగా పోలీసు అధికారులు మాట్లాడుతూ, ఆధ్యాత్మిక సంప్రదాయాలను గౌరవిస్తూ ప్రతి ఏటా భక్తిశ్రద్ధలతో అమ్మవారికి సారె సమర్పించడం ఆనవాయితీగా కొనసాగిస్తున్నామని తెలిపారు. ప్రజలకు సేవలందించడంతో పాటు సామాజిక, ఆధ్యాత్మిక కార్యక్రమాల్లోనూ పోలీసు శాఖ భాగస్వామ్యం అవుతుందని పేర్కొన్నారు.
కార్యక్రమంలో పోలీసు సిబ్బంది, మహిళా పోలీసులు పాల్గొని అమ్మవారి సేవలో భాగస్వాములయ్యారు.
