అయోధ్య రామ మందిరంలో భక్తులు సమర్పించిన విరాళాలు, కానుకల చోరీ ఆరోపణలపై రామ జన్మభూమి ఉద్యమ నేతల్లో ఒకరైన సాధ్వి రితంభర తీవ్ర ఆవేదన వ్యక్తం చేశారు. ఈ ఘటన అత్యంత దురదృష్టకరమని, భక్తుల విశ్వాసాన్ని దెబ్బతీసే అంశమని పేర్కొంటూ, బాధ్యులపై తక్షణమే కఠిన చర్యలు తీసుకోవాలని డిమాండ్ చేశారు.
మధ్యప్రదేశ్లోని ఇండోర్లో మీడియాతో మాట్లాడిన ఆమె, రామ మందిర నిర్మాణం కోసం గత 500 ఏళ్లుగా కోట్లాది మంది ప్రజలు ఆర్థిక సహకారంతో పాటు ప్రాణత్యాగాలు కూడా చేశారని గుర్తు చేశారు. అలాంటి పవిత్ర క్షేత్రానికి భక్తులు విశ్వాసంతో సమర్పించిన కానుకలపై చోరీ ఆరోపణలు రావడం బాధాకరమని అన్నారు.
“ఇది అత్యంత దురదృష్టకరమైన ఘటన. మనందరినీ సిగ్గుపడేలా చేసింది. కొందరి చర్యలు దేశానికి, సమాజానికి, సంప్రదాయాలకు చెడ్డపేరు తీసుకొస్తాయి. ఈ ఘటనకు బాధ్యులైన వారిని గుర్తించి వెంటనే శిక్షించాలి,” అని సాధ్వి రితంభర పేర్కొన్నారు.
రామ మందిరం కోసం అనేక తరాలుగా సాగిన ఉద్యమం, త్యాగాలను గుర్తు చేసిన ఆమె, ఇలాంటి ఘటనలు భక్తుల మనోభావాలను దెబ్బతీస్తాయని అన్నారు. భవిష్యత్తులో ఇటువంటి సంఘటనలు పునరావృతం కాకుండా సమాజంలో నైతిక విలువలను మరింత బలోపేతం చేయాల్సిన అవసరం ఉందని సూచించారు.
ఈ సందర్భంగా యువత పాత్రపైనా ఆమె మాట్లాడారు. భారతదేశ వర్తమానం, భవిష్యత్తు యువత చేతుల్లోనే ఉందని పేర్కొంటూ, దేశం, సంస్కృతి పట్ల అంకితభావంతో పనిచేయాలని పిలుపునిచ్చారు. యువత తమ ప్రతిభను సరైన దిశలో వినియోగించుకోవాలని, భారతీయ పిల్లలను తులసి మొక్కలతో పోలుస్తూ వారికి విలువలు, సంస్కారాలతో కూడిన విద్యను అందించాలని ఆమె అన్నారు.
