కర్నూలు జిల్లా ఆదోని పట్టణంలోని చిన్మయ మిషన్ కేంద్రంలో ఆదివారం బాలవిహార్ శిక్షణ శిబిరం భక్తిశ్రద్ధల మధ్య నిర్వహించారు. ఈ సందర్భంగా చిన్నారులకు ఆటలు, పాటలతో పాటు సనాతన ధర్మానికి సంబంధించిన ఆధ్యాత్మిక బోధనలు అందించారు.
శిబిరంలో భాగంగా శ్రీమద్భాగవతం, మహాభారతం వంటి భారతీయ ఇతిహాసాల విశిష్టతను వివరించడంతో పాటు నీతి కథల ద్వారా ధర్మం, కర్తవ్యం, సంస్కారం, నైతిక విలువల ప్రాధాన్యాన్ని చిన్నారులకు సులభంగా అర్థమయ్యేలా బోధించారు. కార్యక్రమంలో 50 మందికిపైగా చిన్నారులు ఉత్సాహంగా పాల్గొన్నారు.
ఈ సందర్భంగా చిన్మయ మిషన్ స్వామీజీ బ్రహ్మచారి నారాయణ చైతన్య మాట్లాడుతూ, చిన్నతనం నుంచే పిల్లల్లో నైతిక విలువలు, భారతీయ సంస్కృతి, సనాతన ధర్మంపై అవగాహన పెంపొందించడం అత్యంత అవసరమని పేర్కొన్నారు. బాల్యంలో అలవడిన మంచి సంస్కారాలు వారిని భావి భారత పౌరులుగా, సమాజానికి ఆదర్శవంతులుగా తీర్చిదిద్దుతాయని అన్నారు.
బాలవిహార్ వంటి కార్యక్రమాల ద్వారా చిన్నారుల్లో ఆధ్యాత్మిక చింతన, దేశభక్తి, కుటుంబ విలువలు, ధార్మిక జీవన విధానంపై ఆసక్తి పెంపొందించడం చిన్మయ మిషన్ ప్రధాన లక్ష్యమని నిర్వాహకులు తెలిపారు.
