కర్ణాటకలోని బెళగావి జిల్లాలో శతాబ్దాల నాటి ఓ అద్భుత పురాతన రాతి నిర్మాణం వెలుగులోకి వచ్చింది. ఎన్నో ఏళ్లుగా చెత్తాచెదారం, పూడికతో కప్పుకుపోయిన మెట్లబావిని స్థానికులు స్వచ్ఛంద సంస్థ సహకారంతో శుభ్రపరచగా, శివలింగం ఆకారాన్ని తలపించే అద్భుత నిర్మాణం దర్శనమిచ్చింది. ఈ విశిష్ట నిర్మాణం సనాతన భారతీయ శిల్పకళా వైభవానికి, హిందూ నాగరికత గొప్పతనానికి మరో నిదర్శనంగా నిలుస్తోందని స్థానికులు పేర్కొంటున్నారు.
బెళగావి జిల్లా ముతగ గ్రామ పంచాయతీ పరిధిలో ఉన్న ఈ పురాతన మెట్లబావి దాదాపు 300 సంవత్సరాల క్రితం నిర్మించబడినట్లు గ్రామస్థులు చెబుతున్నారు. సుమారు 80 అడుగుల లోతు కలిగిన ఈ బావిలోకి దిగేందుకు 53 రాతి మెట్లు నిర్మించారు. బావి ప్రవేశ ద్వారాలు, భారీ రాతి గోడలు నేటికీ చెక్కుచెదరకుండా ఉండటం అప్పటి శిల్పుల ప్రతిభను చాటుతోంది.
స్థానికుల కథనం ప్రకారం, స్వాతంత్ర్య సమర కాలంలో ఈ మెట్లబావి పరిసరాలను కేంద్రంగా చేసుకుని తమ పూర్వీకులు బ్రిటిష్ పాలకులకు వ్యతిరేకంగా పోరాటం సాగించారు. దీంతో ఈ ప్రాంతం చారిత్రక ప్రాధాన్యాన్ని కూడా సంతరించుకుంది.
అయితే ఈ అద్భుత నిర్మాణాన్ని ఏ రాజవంశం లేదా ఏ పాలకుడు నిర్మించాడనే విషయంపై ఇప్పటికీ స్పష్టమైన ఆధారాలు లభించలేదు. పురావస్తు శాఖ అధికారులు సమగ్ర పరిశోధన చేపట్టి ఈ కట్టడం చరిత్రను వెలికితీయాలని స్థానికులు, చరిత్రాభిమానులు కోరుతున్నారు.
శివలింగాకారంలో కనిపిస్తున్న ఈ పురాతన మెట్లబావి ప్రస్తుతం సోషల్ మీడియాలో విస్తృతంగా చర్చనీయాంశమవుతోంది. భారతీయ సనాతన సంస్కృతి, శిల్పకళా సంపదను పరిరక్షించాల్సిన అవసరాన్ని ఈ అద్భుత నిర్మాణం మరోసారి గుర్తుచేస్తోందని పలువురు అభిప్రాయపడుతున్నారు.
