పశ్చిమ బెంగాల్లోని కోల్కతా మున్సిపల్ కార్పొరేషన్ పాఠశాలల మధ్యాహ్న భోజన పథకంలో గుడ్లకు బదులుగా శాకాహారాన్ని అందించనున్న నిర్ణయం రాజకీయ వివాదానికి దారితీసింది. మధ్యాహ్న భోజన తయారీ బాధ్యతలను ఇస్కాన్ కు అప్పగించడంతో, ఇకపై గుడ్ల స్థానంలో పనీర్, రాజ్మా, సోయాబీన్స్, పాలు వంటి పోషకాహార పదార్థాలను విద్యార్థులకు అందించనున్నారు.
ఈ నిర్ణయంపై ప్రతిపక్ష పార్టీలు తీవ్ర అభ్యంతరం వ్యక్తం చేశాయి. తరతరాలుగా బెంగాలీ పిల్లలు గుడ్లు వంటి జంతు ప్రోటీన్ను ఆహారంలో భాగంగా తీసుకుంటున్నారని, స్థానిక ఆహార సంస్కృతికి విరుద్ధంగా శాకాహారాన్ని రుద్దడం సరికాదని ప్రతిపక్ష నాయకుడు రితబ్రత బెనర్జీ విమర్శించారు.
ప్రభుత్వం ఏమంటోంది?
ఈ ఆరోపణలను రాష్ట్ర ప్రభుత్వం ఖండించింది. పిల్లలకు నాణ్యమైన, పరిశుభ్రమైన, సమతుల్య పోషకాహారం అందించడమే ప్రభుత్వ ఉద్దేశమని స్పష్టం చేసింది. ఇందులో ఎలాంటి మతపరమైన లేదా సిద్ధాంతపరమైన అంశం లేదని తెలిపింది.పాఠశాల విద్యాశాఖ మంత్రి దీపక్ బర్మన్ మాట్లాడుతూ, భోజనంలో గుడ్లు ఉండాలా లేదా అన్నది కాకుండా, పిల్లలకు అవసరమైన పోషకాలు శాస్త్రీయ ప్రమాణాల ప్రకారం అందుతున్నాయా అనే అంశమే ముఖ్యమని పేర్కొన్నారు.
ఇస్కాన్ వివరణ
వివాదంపై స్పందించిన ఇస్కాన్ కోల్కతా ఉపాధ్యక్షుడు రాధారమణ దాస్ మాట్లాడుతూ, దేశవ్యాప్తంగా తమ సంస్థ ఇప్పటికే సుమారు 12 లక్షల మంది విద్యార్థులకు మధ్యాహ్న భోజనం అందిస్తోందని తెలిపారు.గౌడీయ వైష్ణవ సంప్రదాయం బెంగాల్ నేలలోనే పుట్టి శాకాహారాన్ని ప్రోత్సహించిందని ఆయన గుర్తు చేశారు. అందువల్ల బెంగాల్కు శాకాహార సంస్కృతి కొత్త కాదని అన్నారు. అలాగే పప్పుధాన్యాలు, సోయాబీన్స్, పనీర్ వంటి ఆహార పదార్థాల ద్వారా కూడా పిల్లలకు అవసరమైన ప్రోటీన్ను సమృద్ధిగా అందించవచ్చని వివరించారు.
ఈ నిర్ణయంపై రాజకీయ విమర్శలు కొనసాగుతున్నప్పటికీ, పిల్లలకు పోషక విలువలు కలిగిన ఆహారం అందించడమే లక్ష్యమని ప్రభుత్వం, ఇస్కాన్ స్పష్టం చేస్తున్నాయి. మరోవైపు, స్థానిక ఆహారపు అలవాట్లను పరిగణనలోకి తీసుకోవాలని ప్రతిపక్షాలు డిమాండ్ చేస్తున్నాయి.
