అయోధ్య శ్రీరామ జన్మభూమి మందిరంలో విరాళాల చోరీ ఆరోపణలపై ఉత్తరప్రదేశ్ ముఖ్యమంత్రి యోగి ఆదిత్యనాద్ తొలిసారిగా స్పందించారు. ఈ వ్యవహారంలో దోషులు ఎవరైనా సరే కఠిన చర్యలు తప్పవని స్పష్టం చేశారు. శుక్రవారం Ayodhya పర్యటన సందర్భంగా ఆయన ఈ వ్యాఖ్యలు చేశారు.
రామభక్తుల విశ్వాసాలకు భంగం కలిగించేలా ఎవరూ నిరాధార వ్యాఖ్యలు చేయవద్దని ముఖ్యమంత్రి సూచించారు. ఈ కేసుకు సంబంధించి ఎవరి వద్దైనా ఆధారాలు ఉంటే వాటిని ప్రత్యేక దర్యాప్తు బృందం (సిట్)కు అందజేయాలని కోరారు. ఆలయ ట్రస్ట్ విజ్ఞప్తి మేరకే సిట్ను ఏర్పాటు చేశామని, వాస్తవాలు వెలుగులోకి వస్తాయనే పూర్తి నమ్మకం తనకు ఉందని తెలిపారు.
శ్రీరాముని ఆదర్శాలైన గౌరవం, సహనం, ధర్మనిష్ఠలను ప్రతి భక్తుడు ఆచరించాలని యోగి పిలుపునిచ్చారు. అయోధ్య, శ్రీరామ జన్మభూమి ఆలయం గురించి దుష్ప్రచారం చేయడం సమాజ ప్రయోజనాలకు విరుద్ధమని పేర్కొన్నారు.
ఈ సందర్భంగా కాంగ్రెస్, సమాజ్వాదీ పార్టీలపై కూడా యోగి ఆదిత్యనాథ్ తీవ్ర విమర్శలు గుప్పించారు. శ్రీరామ మందిర ఉద్యమాన్ని గతంలో వ్యతిరేకించిన కాంగ్రెస్ ఇప్పుడు బూటకపు ఆందోళనలు చేస్తోందని ఆరోపించారు. రాముడి ఉనికినే ప్రశ్నిస్తూ కోర్టులో అఫిడవిట్లు దాఖలు చేసిన పార్టీ, ఇప్పుడు రామభక్తుల పట్ల కపట ప్రేమ ప్రదర్శిస్తోందని విమర్శించారు.
అలాగే సమాజ్వాదీ పార్టీ కూడా రామభక్తులను తప్పుదోవ పట్టించే ప్రయత్నం చేస్తోందని ఆరోపించారు. ‘జై శ్రీరామ్’ నినాదాలు చేసిన కరసేవకులపై గతంలో ఎందుకు కాల్పులు జరిపారో, ఎందుకు లాఠీచార్జీలు చేశారో ప్రజలకు సమాధానం చెప్పాలని డిమాండ్ చేశారు.
రామాలయానికి సంబంధించిన ప్రతి అంశంలో పారదర్శకత ఉంటుందని, భక్తుల విశ్వాసాన్ని దెబ్బతీసే వారిపై చట్టపరమైన చర్యలు తప్పవని యోగి ఆదిత్యనాథ్ స్పష్టం చేశారు.
