ఉత్తరప్రదేశ్ ముఖ్యమంత్రి యోగి ఆదిత్యనాథ్ గోమాంస వినియోగంపై వ్యాఖ్యలు చేస్తూ చర్చకు దారితీశారు. గోరఖ్పూర్లో నిర్వహించిన ‘నారీ శక్తి వందన్’ కార్యక్రమంలో మాట్లాడిన ఆయన, “గోమాంసం తినేవారు పంది పాలు తాగుతారా?” అని ప్రశ్నించారు.
ఆవు పాలను సహజమైన మరియు దైవిక వరంగా అభివర్ణించిన ఆయన, ప్రపంచవ్యాప్తంగా ప్రజలు ఆవును పూజించినా లేకపోయినా, వినియోగించే పాలు మాత్రం ఆవు పాలు కావడం గమనార్హమని పేర్కొన్నారు. పసికందు తన తల్లి పాలను మాత్రమే తాగడం ప్రకృతి ప్రసాదించిన వరమని ఆయన అన్నారు.
భారతీయ సంస్కృతిలో స్త్రీ శక్తి ప్రాధాన్యం
ఈ సందర్భంగా భారతీయ సంస్కృతిలో స్త్రీ శక్తికి ఉన్న ఉన్నత స్థానం గురించి కూడా ముఖ్యమంత్రి ప్రస్తావించారు. శ్రీరాముడిని ‘కౌసల్య పుత్రుడు’, శ్రీకృష్ణుడిని ‘యశోద ముద్దుబిడ్డ’గా సంబోధించడం మాతృత్వానికి ఇచ్చే గౌరవాన్ని ప్రతిబింబిస్తుందని చెప్పారు. భీష్ముడు, అర్జునుడు వంటి మహనీయులను కూడా వారి తల్లుల పేర్లతో గుర్తించడం భారతీయ సంప్రదాయంలో ఉన్న ప్రత్యేకత అని ఆయన తెలిపారు.
అలాగే మధుర, బృందావన ప్రాంతాల్లో “రాధే-రాధే” అనే నామస్మరణ వినిపిస్తుంటే, కాశీలో “నమః పర్వతీపతయే” అనే మంత్రం ప్రతిధ్వనిస్తుందని పేర్కొన్నారు.
