( మాఘ బహుళ షష్ఠి తిథి – యశోద జయంతి )
లోకంలో తల్లి ప్రేమ మహత్తరమైంది.. పెంచిన ప్రేమ ఇంకా గొప్పది- అంటారు పెద్దలు. వెన్నముద్దలు తినిపిస్తూ కన్నయ్యను అపురూపంగా పెంచింది యశోదాదేవి. అందుకే యశోదమ్మ జన్మించిన మాఘ బహుళ షష్ఠి తిథిని వేడుక చేసుకుంటారు. ఈ రోజున మధుర, బృందావనం, గోకులం తదితర ప్రాంతాల్లో బాలకృష్ణుడితో ఉన్న యశోదమ్మ రూపాన్ని పూజించడం ఆచారం. తమ పిల్లలు క్షేమంగా ఉండాలని కోరుకుంటూ యశోదాదేవిని పూజిస్తారు. దేవకి వసుదేవులు కంసుడి చెరలో ఉండటం వల్ల వారి సంతానమైన కృష్ణుడిని యశోద పెంచింది. ఆమె మాతృవాత్సల్యం వర్ణించనలవి కానిది. భగవత్ స్వరూపుడైన బాలగోపాలుణ్ణి పెంచి పెద్దచేసే అదృష్టం ఆమెకు దక్కడం పూర్వజన్మ సుకృతం. కన్నతల్లి కన్నా మిన్నగా, అపురూపంగా పెంచిందామె. కృష్ణుడి ఆలయాల్లో యశోద జన్మదిన వేడుకలను ఘనంగా నిర్వహిస్తారు. మందిరాలను కనువిందుచేసేలా అలంకరిస్తారు. ప్రత్యేక పూజలు, భజనలు ఏర్పాటు చేస్తారు. యశోద స్వచ్ఛమైన మాతృ హృదయానికి ప్రతీక. కృష్ణుడి పట్ల ఆమెకున్న ప్రేమ, అనురాగం, ఆత్మీయత, త్యాగనిరతి అనిర్వచనీయం.
పెంచిన ప్రేమ గొప్పదని నిరూపిస్తూ, కన్నయ్యను అపురూపంగా, వాత్సల్యంతో పెంచిన యశోదమ్మ, తన చిన్నికృష్ణుని వెన్నముద్దలు తినిపిస్తూ కంటికి రెప్పలా కాపాడుకుంది. సకల విశ్వాన్ని నోటిలో చూసినా, కృష్ణుడిని కేవలం తన చిన్న బిడ్డగానే భావించే అమితమైన మాతృప్రేమ ఆమెది.
యశోద మాతృప్రేమ
కృష్ణుడిని తన ప్రేమతో బంధించిన యశోద, పెంచిన తల్లి ప్రేమకు ప్రతీకగా నిలిచారు.
