స్వాతంత్ర్య వీర్ సావర్కర్ 141వ జయంతి సందర్భంగా ఈ గొప్ప స్వాతంత్ర్య సమరయోధుడి సేవలను గౌరవిస్తూ ముంబైలో ప్రతిష్టాత్మక అవార్డు ప్రదానోత్సవం జరిగింది. ప్రముఖ నటుడు రణదీప్ హుడా ఇటీవలి చిత్రంలో సావర్కర్ పాత్రను అద్భుతంగా పోషించినందుకు స్వాతంత్ర్య వీర్ సావర్కర్ అవార్డు గ్రహీతగా ఎంపికయ్యారు.
అవార్డు ప్రదానోత్సవం సందర్భంగా సావర్కర్ పట్ల తనకున్న ప్రగాఢమైన గౌరవాన్ని, అభిమానాన్ని రణదీప్ హుడా తెలియజేస్తూ భావోద్వేగ ప్రసంగం చేశారు. స్వాతంత్ర్య వీర్ సావర్కర్ గురించి మొదట సినిమా తీయాలని భావించినప్పుడు విప్లవకారుడి జీవితం మరియు రచనల గురించి తనకు అంతగా తెలియదని అయితే విస్తృతమైన పఠనం మరియు పరిశోధన తర్వాత మాత్రమే సావర్కర్ యొక్క అపారమైన త్యాగం మరియు దృఢ సంకల్పాన్ని గ్రహించానని హుడా వివరించారు.
సినిమా తీయడానికి తన ప్రేరణ మరియు సావర్కర్ కథను ప్రేక్షకుల ముందుకు తీసుకురావాలనే బలమైన కోరిక నుంచి ఉద్భవించిందని హుడా తెలియజేశారు. సావర్కర్ జీవితాన్ని, త్యాగాలను ఎందుకు గుర్తించలేదని, ప్రశంసించలేదని ఈ సందర్భంగా ఆయన ప్రశ్నించారు. సావర్కర్ జీవితాన్ని వెండితెరపై ఆవిష్కరించే అవకాశం తనకు రావడం అదృష్టంగా భావిస్తున్నానని పేర్కొన్నారు.
మే నెలలో విడుదలైన స్వతంత్ర వీర్ సావర్కర్ చిత్రం స్వాతంత్ర్యానికి పూర్వం పరిస్థితులను రిక్రియేట్ చేసింది. సావర్కర్ జీవిత కథను వెండితెరపై ఆవిష్కరించడంలో రణదీప్ హుడా తపన ప్రతీ సన్నివేశంలోనూ కనిపించింది. సావర్కర్ పాత్రలో రణదీప్ హుడా ఒదిగిపోయి నటించారు. ఆ పాత్ర కోసం తనను తాను మార్చుకున్న తీరు చూస్తే హ్యాట్సాఫ్ అనాల్సిందే.
