బంగ్లాదేశ్‌లో భూవివాదాన్ని పరిష్కరించేందుకు మధ్యవర్తిత్వం చేస్తుండగా 55 ఏళ్ల హిందూ ఉపాధ్యాయుడు మనోరంజన్‌ రాయ్‌ దారుణ హత్యకు గురయ్యారు. దినాజ్‌పూర్‌ జిల్లాలో ఈ ఘటన చోటుచేసుకున్నట్లు సమాచారం. భూవివాదంలో ఉన్న ఇరు వర్గాల మధ్య ఉద్రిక్తతలు పెరగడంతో పరిస్థితిని చక్కదిద్దేందుకు ప్రయత్నించిన ఆయనపై దాడి జరిగినట్లు పోలీసులు తెలిపినట్లు కథనంలో పేర్కొన్నారు.
మనోరంజన్‌ రాయ్‌ ప్రభుత్వ ప్రాథమిక పాఠశాలలో సహాయ ప్రధాన ఉపాధ్యాయుడిగా పనిచేస్తున్నారు. భూమికి సంబంధించిన వివాదంపై ఇరు వర్గాల మధ్య చర్చలు జరుగుతున్న సమయంలో ఆయన జోక్యం చేసుకున్నారు. ఈ క్రమంలో పరిస్థితి అదుపు తప్పి ఆయనపై దాడి జరిగినట్లు సమాచారం.
హత్యను ఖండించిన హిందూ సంఘం
ఈ ఘటనను బంగ్లాదేశ్ హిందూ సమ్మిలన్‌ సంఘం తీవ్రంగా ఖండించింది. మనోరంజన్‌ రాయ్‌ హత్యను సాధారణ నేరంగా మాత్రమే చూడలేమని సంఘం పేర్కొంది. సంఘం ప్రధాన కార్యదర్శి ఎం.కె. రాయ్‌ మాట్లాడుతూ.. ఈ ఘటన చట్టబద్ధ పాలన, మానవత్వం, మతసామరస్యానికి విఘాతం కలిగించిందని వ్యాఖ్యానించారు.
నిందితులను అరెస్టు చేయాలని డిమాండ్‌
ఈ హత్యలో పాల్గొన్న వారందరినీ వెంటనే అరెస్టు చేసి, చట్ట ప్రకారం కఠినంగా శిక్షించాలని సంఘం డిమాండ్‌ చేసింది. మృతుడి కుటుంబానికి భద్రత కల్పించడంతోపాటు తగిన పరిహారం అందించాలని ప్రభుత్వాన్ని కోరింది. దేశవ్యాప్తంగా హిందువుల భూముల ఆక్రమణలు, వేధింపులను అరికట్టేందుకు సమర్థమైన చర్యలు తీసుకోవాలని విజ్ఞప్తి చేసింది. హిందువుల ప్రాణాలు, ఆస్తులకు రక్షణ కల్పించేలా ప్రభుత్వం చర్యలు చేపట్టాలని పేర్కొంది.
బాధిత కుటుంబానికి న్యాయం జరిగేనా?
భూవివాదాల పరిష్కార క్రమంలో చోటుచేసుకున్న ఈ హింసాత్మక ఘటన స్థానికంగా శాంతిభద్రతలపై ఆందోళనలకు దారితీసింది. మనోరంజన్‌ రాయ్‌ హత్య కేసులో నిందితులను గుర్తించి, చట్టపరమైన చర్యలు తీసుకోవడం, బాధిత కుటుంబానికి భద్రతతోపాటు పరిహారం కల్పించాలన్న డిమాండ్లపై ప్రభుత్వం స్పందించడం ఇప్పుడు కీలకంగా మారింది.
