ఉత్తర ప్రదేశ్లోని సహారన్పూర్ జిల్లా కలెక్టరేట్ ప్రాంగణంలో ప్రభుత్వ స్థలాన్ని ఆక్రమించి నిర్మించినట్లు ఆరోపణలు ఎదుర్కొంటున్న ఒక మసీదును జిల్లా యంత్రాంగం కూల్చివేసింది. కోర్టు ఇచ్చిన తుది ఉత్తర్వుల ఆధారంగా అధికారులు ఈ చర్యలు చేపట్టారు.
కలెక్టరేట్ కాంప్లెక్స్లోని ప్రభుత్వ స్థలంలో మసీదును అక్రమంగా నిర్మించారని, అక్కడ వాణిజ్య కార్యకలాపాలు సాగిస్తున్నారని బజరంగ్ దళ్ మాజీ ప్రాంతీయ కన్వీనర్ వికాస్ త్యాగి 2025లో ఫిర్యాదు చేశారు. దీనిపై విచారణ జరిపిన సిటీ మేజిస్ట్రేట్ కోర్టు, ఆ నిర్మాణాన్ని అక్రమ ఆక్రమణగా నిర్ధారిస్తూ గతంలోనే ఖాళీ చేయాలని ఆదేశించడంతో పాటు రూ. 6.41 కోట్ల జరిమానా విధించింది.
సిటీ మేజిస్ట్రేట్ ఇచ్చిన తీర్పును సవాలు చేస్తూ మసీదు కమిటీ జిల్లా కోర్టును ఆశ్రయించింది. అయితే విచారణ జరిపిన జిల్లా కోర్టు, మసీదు కమిటీ దాఖలు చేసిన పిటిషన్ను కొట్టివేస్తూ సిటీ మేజిస్ట్రేట్ ఇచ్చిన ఉత్తర్వులను సమర్థించింది.
కోర్టు తీర్పు వెలువడిన అనంతరం, శాంతిభద్రతల పరిరక్షణ నిమిత్తం కలెక్టరేట్ ప్రాంగణంలోని ఐదు ప్రధాన ద్వారాలను అధికారులు మూసివేశారు. ర్యాపిడ్ యాక్షన్ ఫోర్స్ (RAF), ప్రొవిన్షియల్ ఆర్మ్డ్ కానిస్టేబులరీ (PAC) మరియు భారీ పోలీసు బలగాలను రంగంలోకి దించి కూల్చివేత ప్రక్రియను పూర్తి చేశారు.
ఈ సమయంలో ఎటువంటి ఉద్రిక్తతలు చోటుచేసుకోకుండా కలెక్టరేట్ పరిసర ప్రాంతాల్లో గట్టి బందోబస్తు ఏర్పాటు చేశారు. చట్టపరమైన ప్రక్రియను అనుసరించే ఈ ఆక్రమణ తొలగింపు చర్యలు చేపట్టినట్లు అధికారులు వెల్లడించారు.
