రాజస్థాన్ : జోధ్పూర్లోని న్యాయమూర్తుల అధికారిక నివాసాలు, పాఠశాలలు, కళాశాలలు, ఆలయాలు, ఇతర ప్రభుత్వ, ప్రైవేట్ ఆస్తులు అధికారిక రికార్డుల్లో వక్ఫ్ ఆస్తులుగా నమోదు చేసినట్లు వెలువడిన వార్తా కథనాన్ని రాజస్థాన్ హైకోర్టు సుమోటోగా పరిగణించి ప్రజా ప్రయోజన వ్యాజ్యం (పిల్)గా నమోదు చేసింది. ఈ అంశంపై సమగ్ర విచారణ చేపట్టాలని కోర్టు నిర్ణయించింది.
వార్తా కథనం ప్రకారం, రెవెన్యూ రికార్డుల్లో యాజమాన్య వివరాలు భిన్నంగా ఉన్నప్పటికీ, పలు ప్రధాన ఆస్తులను వక్ఫ్ రికార్డుల్లో చేర్చి కేంద్ర ప్రభుత్వం నిర్వహిస్తున్న ఉమ్మీద్ (UMEED) పోర్టల్లో వక్ఫ్ ఆస్తులుగా జాబితా చేసినట్లు పేర్కొన్నారు.
విచారణ సందర్భంగా కోర్టు, రెవెన్యూ రికార్డులకు భిన్నంగా విద్యాసంస్థలు, ప్రార్థనా స్థలాలు, న్యాయమూర్తుల నివాసాలు, ఇతర నివాస, వాణిజ్య ఆస్తులను వక్ఫ్ రికార్డుల్లో నమోదు చేయడం ప్రాథమిక దృష్ట్యా (ప్రైమా ఫేసీ) తీవ్ర ఆందోళన కలిగించే అంశమని వ్యాఖ్యానించింది. ఇది కేవలం వ్యక్తిగత యాజమాన్య వివాదాలకే పరిమితమైన అంశం కాదని, విస్తృత ప్రజా ప్రయోజనాలకు సంబంధించిన విషయమని పేర్కొంది.
ఖస్రా నంబర్లు 482, 485, 490 పరిధిలోని ఆస్తులతో పాటు వార్తా కథనంలో ప్రస్తావించిన ఇతర ఆస్తుల విషయంలో యథాతథ స్థితిని (స్టేటస్ క్వో) కొనసాగించాలని కోర్టు మధ్యంతర ఉత్తర్వులు జారీ చేసింది. వివాదాస్పద నమోదుల ఆధారంగా ఆస్తుల భౌతిక లేదా చట్టపరమైన స్థితిని మార్చే విధంగా బదిలీలు, లీజులు, లైసెన్సులు, నిర్మాణాలు, కూల్చివేతలు లేదా ఇతర చర్యలు చేపట్టవద్దని సంబంధిత అధికారులను ఆదేశించింది.
వార్తా కథనంలో వక్ఫ్ ఆస్తులుగా నమోదైనట్లు పేర్కొన్న వాటిలో సోహన్లాల్ మణిహార్ స్కూల్, షా గోవర్ధన్లాల్ కబ్రా కాలేజ్, కబ్రా మాతృశ్రీ కళా మందిర్, అగర్వాల్ బగీచీ, అగర్వాల్ మహావీర్ మందిర్, సద్గురు కబీర్ ఆశ్రమం, గౌరేశ్వర్ మహాదేవ్ మందిర్, మారు లోహర్ సిక్లిగర్ మందిర్, జునాగఢ్ న్యాతి బగీచీ, రెండు న్యాతి భవనాలు, గీతా భవన్, అలాగే రాజస్థాన్ హైకోర్టు న్యాయమూర్తి జస్టిస్ వినీత్ కుమార్ మాథూర్, జార్ఖండ్ మాజీ ప్రధాన న్యాయమూర్తి ప్రకాష్ తటియా అధికారిక నివాసాలు కూడా ఉన్నట్లు పేర్కొన్నారు. ఈ ఆరోపణలపై విచారణ కొనసాగుతోంది.
