యునైటెడ్ కింగ్డమ్ లో బ్రాడ్ఫోర్డ్ హిందూ కౌన్సిల్ (BHC) ఆధ్వర్యంలో మే 17న నిర్వహించిన 5వ వార్షిక “108 హనుమాన్ చాలీసా పారాయణం” కార్యక్రమం భక్తి, సామరస్యం, ఆధ్యాత్మికతకు ప్రతీకగా నిలిచింది.
ఈ కార్యక్రమంలో 350 మందికి పైగా భక్తులు, అతిథులు పాల్గొన్నారు. హనుమాన్ పూజతో ప్రారంభమైన కార్యక్రమంలో బ్రాడ్ఫోర్డ్, లీడ్స్, ఆష్టన్-అండర్-లైన్ ప్రాంతాల భజన బృందాలు కలిసి 108 సార్లు హనుమాన్ చాలీసా పారాయణం చేశాయి.
వివిధ మతాలకు చెందిన అతిథులు కూడా ఈ కార్యక్రమంలో పాల్గొనడం విశేషం. దీనివల్ల పరస్పర గౌరవం, సామాజిక సామరస్యం, ఆధ్యాత్మిక ఐక్యత మరింత బలపడిందని నిర్వాహకులు తెలిపారు.
ప్రపంచవ్యాప్త భగవద్గీత పారాయణంలో 35 వేల మంది
ప్రపంచవ్యాప్తంగా చిన్మయ మిషన్ తన 75వ వార్షికోత్సవ వేడుకల సందర్భంగా మే 9న “చిన్మయ గీతా సమర్పణం” పేరుతో ప్రపంచవ్యాప్త ఆన్లైన్ భగవద్గీత పారాయణ కార్యక్రమాన్ని నిర్వహించింది.
ఈ కార్యక్రమంలో 70 దేశాలకు చెందిన 35,000 మందికి పైగా భక్తులు, ఆధ్యాత్మిక సాధకులు పాల్గొన్నారు. భగవద్గీతలోని 15వ అధ్యాయాన్ని ఒకేసారి పారాయణం చేయడం ద్వారా విశ్వవ్యాప్తంగా సనాతన ధర్మ సందేశాన్ని వ్యాప్తి చేశారు.
ఈ కార్యక్రమం “అతిపెద్ద ఏకకాల ఆన్లైన్ పారాయణ కార్యక్రమం” విభాగంలో గిన్నిస్ వరల్డ్ రికార్డ్స్ గుర్తింపుకు నామినేట్ చేయబడినట్లు నిర్వాహకులు తెలిపారు.
చిన్మయ మిషన్ గ్లోబల్ హెడ్ పూజ్య స్వామి స్వరూపానంద మాట్లాడుతూ, భగవద్గీత బోధనల ద్వారా ప్రపంచవ్యాప్తంగా ఉన్న హిందువులను ఒకే ఆధ్యాత్మిక వేదికపై ఏకం చేయడమే ఈ కార్యక్రమం ముఖ్య ఉద్దేశ్యమని పేర్కొన్నారు. అనేక దేశాలకు చెందిన సనాతన ధర్మ సంస్థలు, ఆధ్యాత్మిక సంఘాలు కూడా ఈ కార్యక్రమానికి మద్దతు అందించాయి.
సనాతన ధర్మ వైభవం ప్రపంచవ్యాప్తంగా విస్తరిస్తోంది
బ్రిటన్లో హనుమాన్ చాలీసా పారాయణం, ప్రపంచవ్యాప్త గీతా జపం వంటి కార్యక్రమాలు విదేశాల్లో నివసిస్తున్న హిందూ సమాజం తమ ధార్మిక, సాంస్కృతిక మూలాలను సజీవంగా కొనసాగిస్తున్నదానికి నిదర్శనంగా నిలుస్తున్నాయి.
