ఉత్తరప్రదేశ్లోని వారణాసిలో రైల్వే శాఖకు చెందిన భూమిలో నిర్మించబడినట్లు పేర్కొన్న ‘అజాయిబ్ షహీద్ మసీదు’ను కోర్టు ఉత్తర్వుల మేరకు అధికారులు కూల్చివేశారు. జూన్ 2వ తేదీ అర్ధరాత్రి చేపట్టిన ఈ ప్రత్యేక ఆపరేషన్లో ఐదు బుల్డోజర్ల సహాయంతో భవనాన్ని నేలమట్టం చేశారు.
అధికారుల సమాచారం ప్రకారం, సుమారు 42 అడుగుల ఎత్తులో ఉన్న నిర్మాణాన్ని కేవలం 22 నిమిషాల్లో కూల్చివేయగా, అనంతరం శిథిలాలను ట్రక్కుల ద్వారా అక్కడి నుంచి తొలగించారు. శాంతిభద్రతల పరిరక్షణ కోసం వెయ్యికి పైగా పోలీసు సిబ్బందిని మోహరించారు.
ఈ స్థలం రైల్వే శాఖకు చెందినదని అధికారులు పేర్కొన్నారు. భూమి యాజమాన్యంపై వివాదం కోర్టుకు వెళ్లగా, తీర్పు రైల్వే శాఖకు అనుకూలంగా వచ్చినట్లు సమాచారం. అనంతరం స్థలాన్ని ఖాళీ చేయాలని రైల్వే శాఖ పలుమార్లు నోటీసులు జారీ చేసినప్పటికీ స్పందన రాకపోవడంతో కూల్చివేత చర్యలు చేపట్టినట్లు అధికారులు తెలిపారు.
ప్రస్తుతం కాశీ రైల్వే స్టేషన్ విస్తరణ పనులు కొనసాగుతున్న నేపథ్యంలో సంబంధిత భూమిని స్వాధీనం చేసుకునే ప్రక్రియలో భాగంగా ఈ చర్య చేపట్టినట్లు తెలుస్తోంది.
స్థానికంగా ఈ నిర్మాణం సుమారు 200 సంవత్సరాల పురాతనమని కొందరు పేర్కొంటుండగా, మరికొందరు ఇది ఇటీవలి దశాబ్దాల్లో నిర్మించబడిందని అభిప్రాయపడుతున్నారు. అయితే దీనిపై అధికారికంగా స్పష్టమైన సమాచారం వెలువడాల్సి ఉంది.
