అమరావతి: ప్రపంచాన్ని సన్మార్గంలో నడిపించి మానవాళికి దిశానిర్దేశం చేసే గురువులను భక్తిశ్రద్ధలతో పూజించడం భారతీయ సంస్కృతిలో అత్యున్నత సంప్రదాయమని భవఘ్ని గురూజీ పేర్కొన్నారు. మండల పరిధిలోని వైకుంఠపుర భవఘ్ని ఆరామంలో నిర్వహిస్తున్న గురు పౌర్ణమి మహోత్సవాలు భక్తిపూర్వక వాతావరణంలో ప్రారంభమయ్యాయి.
ఈ సందర్భంగా భవఘ్ని గురూజీ మాట్లాడుతూ, ప్రపంచంలో మరెక్కడా లేనంత విశిష్టమైన ఆధ్యాత్మిక జ్ఞాన సంపద భారతదేశానికి మాత్రమే సొంతమని అన్నారు. ఋషులు, మునులు అందించిన సనాతన ధర్మ జ్ఞానాన్ని సామాన్య ప్రజలకు సులభంగా అర్థమయ్యే విధంగా బోధించే గురువులను స్మరించుకోవడం ప్రతి ఒక్కరి అదృష్టమని తెలిపారు.
మహోత్సవాల్లో భాగంగా వేకువజామున వ్యాసభగవానులకు సుప్రభాత సేవ నిర్వహించారు. అనంతరం వ్యాసభగవానుడి ఉత్సవమూర్తికి రథోత్సవం వైభవంగా నిర్వహించగా, ఆదిగురువు వేదవ్యాస మహర్షికి ప్రత్యేక పూజలు, అర్చనలు చేశారు.
ఈ వేడుకలకు రాష్ట్రంలోని పలు జిల్లాల నుంచి భారీ సంఖ్యలో భక్తులు హాజరై గురువుల ఆశీర్వాదాలు పొందారు. కార్యక్రమం అనంతరం భక్తులందరికీ అన్నదాన కార్యక్రమం నిర్వహించారు. మహోత్సవాల ఏర్పాట్లను నిర్వాహకులు పర్యవేక్షించి, భక్తులకు అన్ని సౌకర్యాలు కల్పించారు.
