ఉత్తరప్రదేశ్లోని సంభాల్ జిల్లా జలాలాబాద్ సరాయ్ ప్రభుత్వ పాఠశాలలో ఇద్దరు ముస్లిం ఉపాధ్యాయులు హిందూ విద్యార్థులను ఇస్లామిక్ ఆచారాలు పాటించమని ఒత్తిడి చేశారనే ఆరోపణలు తీవ్ర చర్చకు దారితీశాయి. అంజర్ అహ్మద్, మహమ్మద్ గుల్ ఎజాజ్గా గుర్తించిన ఈ ఉపాధ్యాయులు హిందూ బాలికలను హిజాబ్లు ధరించమని, బాలురను ఇస్లామిక్ టోపీలు పెట్టుకుని ప్రార్థనలు చేయమని ప్రోత్సహించినట్లు ఆరోపణలు వెలువడ్డాయి. అలాగే పాఠశాల ఆవరణలో ఇతర మతాలపై అవమానకర వ్యాఖ్యలు చేసినట్లు కూడా సమాచారం.
ఈ ఘటనకు సంబంధించిన వీడియోలు సోషల్ మీడియాలో వైరల్ కావడంతో విషయం వెలుగులోకి వచ్చింది. దీంతో జిల్లా యంత్రాంగం వెంటనే స్పందించింది. జిల్లా మేజిస్ట్రేట్ అంకిత్ ఖండేల్వాల్ ఆదేశాల మేరకు ఇద్దరు ఉపాధ్యాయులను సస్పెండ్ చేశారు. అలాగే ఈ విషయాన్ని ఉన్నతాధికారులకు తెలియజేయకుండా నిర్లక్ష్యం వహించినందుకు పాఠశాల ప్రిన్సిపాల్ బాలేష్ కుమార్పై కూడా సస్పెన్షన్ చర్యలు తీసుకున్నారు.
ఈ వ్యవహారంపై పూర్తి స్థాయి విచారణ కోసం చీఫ్ డెవలప్మెంట్ ఆఫీసర్ నేతృత్వంలో ముగ్గురు సభ్యుల కమిటీని ఏర్పాటు చేశారు. ఈ కమిటీ ఘటనలో మరెవరైనా పాత్ర ఉన్నదా అనే అంశాన్ని కూడా పరిశీలించనుంది.
ఈ సందర్భంగా జిల్లా మేజిస్ట్రేట్ మాట్లాడుతూ, “విద్యా సంస్థల్లో విద్య పేరుతో ఎలాంటి మతపరమైన లేదా భావజాలపరమైన ఒత్తిడిని సహించబోము. దోషులుగా తేలిన వారిపై కఠిన చర్యలు తీసుకుంటాం” అని స్పష్టం చేశారు.
ఈ ఘటన విద్యాసంస్థల్లో, విద్యార్థుల స్వేచ్ఛ మరియు భారతీయ సాంస్కృతిక విలువల పరిరక్షణపై మరోసారి చర్చకు దారితీసింది.
