బెంగళూరు (కర్ణాటక): అక్రమ వలసదారులపై బెంగళూరు పోలీసులు భారీ ఆపరేషన్ నిర్వహించారు. ఎలక్ట్రానిక్ సిటీ సబ్ డివిజన్ పరిధిలోని 29 ప్రాంతాల్లో ఏకకాలంలో సోదాలు చేపట్టి 1,909 మందిని అదుపులోకి తీసుకున్నారు. వీరిలో 15 మందిని అక్రమ బంగ్లాదేశీ వలసదారులుగా గుర్తించినట్లు పోలీసులు తెలిపారు.
బెంగాల్, అస్సాం సరిహద్దుల్లో అక్రమ వలసదారులపై చర్యలు ముమ్మరం కావడంతో కొందరు దక్షిణ భారతదేశం వైపు, ముఖ్యంగా బెంగళూరుకు తరలివస్తున్నారన్న సమాచారంతో ఈ ఆపరేషన్ చేపట్టినట్లు తెలుస్తోంది.
23 ప్రత్యేక బృందాలతో సోదాలు
ఆపరేషన్ కోసం బెంగళూరు పోలీసులు 23 ప్రత్యేక బృందాలను ఏర్పాటు చేశారు. మొత్తం 295 మంది పోలీసు అధికారులు, సిబ్బంది ఇందులో పాల్గొన్నారు. డిప్యూటీ కమిషనర్ ఆఫ్ పోలీస్ ఎం. నారాయణ పర్యవేక్షణలో ఈ తనిఖీలు నిర్వహించినట్లు సమాచారం.
నకిలీ ఆధార్ కార్డుల ఆరోపణ
అదుపులోకి తీసుకున్న 15 మంది బంగ్లాదేశ్లోని ఖుల్నా జిల్లాకు చెందినవారిగా పోలీసులు గుర్తించినట్లు సమాచారం. వీరు భారత్లో నివసించేందుకు నకిలీ ఆధార్ కార్డులు పొందినట్లు దర్యాప్తులో వెల్లడైనట్లు తెలుస్తోంది.
అక్రమంగా భారత్లోకి ప్రవేశించడం, నకిలీ గుర్తింపు పత్రాలు వినియోగించడం వంటి అంశాలపై పోలీసులు దర్యాప్తు కొనసాగిస్తున్నారు. బెంగళూరులో అక్రమ వలసదారుల ఉనికిపై మరింత నిఘా పెంచే అవకాశం ఉందని పోలీసు వర్గాలు తెలిపాయి.
