పసిఫిక్ మహాసముద్రంలో ఆస్ట్రేలియాకు సమీపంలో ఉన్న ద్వీప దేశమైన ఫిజిలోని, చారిత్రాత్మక సంబుల శివాలయంపై దాడి చేసి, ఆలయాన్ని దానిలోని విగ్రహాలను ఒక దుండగుడు ధ్వంసం చేశాడు. ఈ సంఘటనకు సంబంధించిన వీడియో సోషల్ మీడియాలో వైరల్ కావడంతో విమర్శలు వెల్లువెత్తుతున్నాయి. ఇది అక్కడి హిందువులను ఆగ్రహానికి గురిచేసింది. దీనిపై ఫిజి మాజీ అటార్నీ జనరల్ అయ్యాజ్ సయ్యద్ ఖయ్యుమ్ మాట్లాడుతూ, “ఫిజిలో నివసిస్తున్న భారత సంతతి పౌరులపై దాడులు పెరిగాయని అన్నారు. ఈ కేసులో 28 ఏళ్ల నిందితుడిని అధికారులు అరెస్టు చేశారు. సువా జ్యుడీషియల్ మేజిస్ట్రేట్ కోర్టు అతనికి రెండు వారాల జైలు శిక్ష విధించింది. ఈ దారుణమైన చర్యపై ఫిజి పోలీస్ కమిషనర్ ఆగ్రహం వ్యక్తం చేశారు. శాంతిని కాపాడుకోవాలని ఆయన పౌరులకు విజ్ఞప్తి చేశారు. కాగా ఫిజిలో 24 శాతం హిందూ జనాభా ఉన్నారు.
ఫిజిలోని శ్రీ సనాతన ధర్మ ప్రతినిధి సభ హిందూ ప్రార్థనా స్థలాల భద్రతను పెంచాలని మరియు చట్టాన్ని మరింత కఠినతరం చేయాలని ప్రభుత్వాన్ని డిమాండ్ చేసింది. శ్రీ సనాతన ధర్మ ప్రతినిధి సభ అధ్యక్షుడు ధీరేంద్ర నంద్ మాట్లాడుతూ, “ఫిజిలోని ఈ శివాలయం చుట్టూ కంచె ఉండేది. నిందితుడు కంచె ఎక్కి ఆలయంలోకి ప్రవేశించాడు. ఆలయ గర్భగుడిలోని విగ్రహాలను ధ్వంసం చేశాడు. ఆలయాన్ని జాగ్రత్తగా చూసుకోవడానికి అక్కడ ఉన్న వ్యక్తిపై కూడా దాడి చేశాడు” అని అన్నారు. ఈ సంఘటన హిందూ సమాజ భావాలను తీవ్రంగా గాయపరిచిందని నంద్ అన్నారు.
ఫిజిలో జరిగిన ఈ సంఘటనను ఆర్య ప్రతినిధి సభ కూడా తీవ్రంగా ఖండించింది. “ఆర్యసభ ఇటువంటి సంఘటనలను నేరపూరిత చర్యలుగా మరియు మత స్వేచ్ఛ యొక్క ప్రాథమిక సూత్రాలపై దాడిగా భావిస్తుంది. ఇతరులను పరస్పర గౌరవం మరియు శాంతితో జీవించనివ్వడం ఫిజి యొక్క బహుళ సాంస్కృతిక సామాజిక వ్యవస్థకు పునాది” అని ఆర్య సభ పేర్కొంది.
