రాజస్థాన్ ప్రభుత్వం బుధవారం నాడు అసెంబ్లీలో ప్రభుత్వ బడ్జెట్ ను ప్రవేశపెట్టింది. ఈ ప్రత్యేక సందర్భంలో రాష్ట్ర ప్రభుత్వం మొత్తం 200 మంది ఎమ్మెల్యేలకు ఐఫోన్ -13ని బహుమతిగా అందించింది. ఒక ఫోన్ ధర దాదాపు 1 లక్షా 20 వేల వరకూ ఉంటుందని సమాచారం. దీంతో ఎమ్మెల్యేలకు కానుకలు ఇవ్వడానికే ప్రభుత్వం రెండు కోట్ల రూపాయలు ఖర్చు చేయాల్సి వస్తోంది. ఈ ఐఫోన్లను తీసుకోవడానికి స్వయంగా ఏ ఎమ్మెల్యేలూ రాలేదు. కానీ వారి ఉద్యోగులు మాత్రం ఈ బహుమతిని తీసుకుని వెళ్లారు. రాజస్థాన్ లో ఎమ్మెల్యేలకు ఇంత ఖరీదైన బహుమతులు ఇవ్వడం ఇదే మొదటిసారి కాదు, ఇంతకుముందు కూడా ఇలా జరిగింది. ఎమ్మెల్యేలందరినీ హైటెక్ చేసి పేపర్ లెస్ వైపు వెళ్లాలన్న ఉద్దేశ్యంతోనే ఇలా చేస్తున్నామని రాష్ట్ర ప్రభుత్వ వాదన. ప్రతిదీ డిజిటల్ గా మార్చడానికి ప్రాధాన్యత ఇస్తున్నారు. రాజస్థాన్ ప్రభుత్వం తన కొత్త బడ్జెట్ ను సమర్పించినప్పుడు, బడ్జెట్ పత్రాలన్నీ బ్రీఫ్కేస్ కు బదులుగా ఐఫోన్లో ఇచ్చారు. ఇవే కారణాలతో గతంలో ఎమ్మెల్యేలకు ల్యాప్టాప్ లు కూడా ఇచ్చారు. గతేడాది యాపిల్ ట్యాబ్లెట్లను అందించారు. ఇప్పుడు ఐఫోన్ లు ఇచ్చారు.
తిరస్కరించిన భాజపా ఎమ్మెల్యేలు…..
రాజస్థాన్ బీజేపీ ఎమ్మెల్యేలు మాత్రం ఈ బహుమతిని తిరస్కరించారు. రాజస్థాన్ బీజేపీ అధ్యక్షుడు సతీష్ పూనియా ట్వీట్ చేస్తూ, “గులాబ్ కటారియా, రాజేంద్ర రాథోడ్, ఇతర ఎమ్మెల్యేలతో చర్చించిన తరువాత, రాజస్థాన్ ప్రభుత్వంలోని బీజేపీ ఎమ్మెల్యేలందరూ ఆర్థిక భారాన్ని దృష్టిలో ఉంచుకుని కాంగ్రెస్ ప్రభుత్వం ఇచ్చిన ఐఫోన్లను తిరిగి ఇచ్చేస్తామని స్పష్టం చేశారు”. ప్రజాధనాన్ని ఇలా ఖర్చు చేస్తున్న రాజస్థాన్ కాంగ్రెస్ ప్రభుత్వంపై సర్వత్రా తీవ్ర విమర్శలు వ్యక్తం అవుతూ ఉన్నాయి.
