News

భారత భూమిపై ఐకమత్యం నెలకొల్పి మనం ప్రపంచాన్ని మురిపించాలి. ఈ భారత భూమి మానవ జాతికి తీర్థక్షేత్రం కాగలదు. అన్ని మతాలు, భిన్న సంస్కృతులు ఇక్కడ కాపురం చేస్తున్నాయి. ఇది విని అన్ని దేశాలూ భారత భూమికి దగ్గరకాగలవు. ఈ చారిత్రాత్మక మహాకార్యాన్ని మనం సాధించాలి. ఈ మహా ధ్యేయం మనల్ని ఎలుగెత్తి పిలుస్తుంది. భారతీయ సంస్కృతీ ఉపసాకులందరూ శ్రద్ధతో త్యాగపూర్వకంగా దీనికై నడుం కట్టాలి. తొందరపాటు వద్దు. స్వార్ధం వద్దు. సోమరితనం వద్దు. సమాజంపై ప్రేమ, చింతన అవసరం. సమాజాన్ని ఎలా సుఖవంతంగా వుంచాలో అన్న చింతనలోనే వుండాలి.-సానే గురూజీ...

ఓ ఆధ్యాత్మిక సాధకుడు ఎన్నో ఏళ్లుగా దట్టమైన అడవిలో తపస్సు చేసుకుంటున్నాడు. అతడి తపోదీక్ష సాగుతుండగా.. దేవేంద్రుడు అతణ్ణి పరీక్షించాలనుకున్నాడు. ఒకరోజు ఆ మునీశ్వరుడి ముందు ప్రత్యక్షమై, ఒక ఖడ్గాన్ని ఇచ్చి.. ‘మునివర్యా! నేను పని మీద వెళ్తున్నాను. తిరిగొచ్చే వరకూ దీన్ని పదిలపరచండి. కొన్నాళ్ల తర్వాత తీసుకుంటాను’ అన్నాడు. మహర్షి అందుకు సమ్మతించి ఇంద్రుడి ఖడ్గాన్ని తీసుకున్నాడు. దాన్ని రక్షించేందుకు ముని నిరంతరం తనతోనే ఉంచుకునేవాడు. ఎక్కడికెళ్లినా కరవాలాన్ని నడుముకి ధరించేవాడు. సాధన నుంచి ఆయన మనసు కరవాలం మీదికి మరలింది. అంతేకాదు.. చేతిలో ఆయుధం ఉండేసరికి మధ్య మధ్యలో ఏమీ తోచక చెట్ల కొమ్మల్ని నరకటం, ఫలాల్ని కోయటం పనిగా పెట్టుకున్నాడు. దేవేంద్రుడు తిరిగొచ్చేసరికి.. ఖడ్గం ప్రభావంతో అతడి ప్రవృత్తే మారిపోయింది. సాత్వికుడు కాస్తా రాజసికుడిగా మారాడు. ఇది రామాయణంలో సీతాదేవి చెప్పిన కథ....