
రాజమహేంద్రవరం: 2027లో నిర్వహించనున్న గోదావరి పుష్కరాలను దృష్టిలో ఉంచుకుని రాజమహేంద్రవరం నగరంతో పాటు గోదావరి పరివాహక ప్రాంతాల్లో మౌలిక సదుపాయాల అభివృద్ధిపై ప్రభుత్వం ప్రత్యేక దృష్టి సారించింది. లక్షలాది మంది భక్తులు పుణ్యస్నానాలు ఆచరించేందుకు తరలివచ్చే అవకాశం ఉండటంతో ఘాట్ల అభివృద్ధి, రవాణా, పార్కింగ్, వసతి, తాగునీరు, పారిశుధ్యం, భద్రత తదితర ఏర్పాట్లపై ముందస్తు కార్యాచరణ రూపొందిస్తున్నారు.
ఈ నేపథ్యంలో పుష్కరాల ప్రత్యేక అధికారి, పురపాలక పరిపాలన శాఖ కార్యదర్శి ఎస్. సురేష్ కుమార్ రాజమహేంద్రవరం నగర పరిధిలో విస్తృతంగా పర్యటించి క్షేత్రస్థాయిలో ఏర్పాట్లను పరిశీలించారు. వివిధ శాఖల అధికారులతో సమీక్ష నిర్వహించి భక్తులకు ఎలాంటి అసౌకర్యం కలగకుండా అవసరమైన సదుపాయాలను ముందుగానే గుర్తించి అభివృద్ధి చేయాలని సూచించారు.
కాతేరు, జాలరుపేట ప్రాంతాల్లో పరిశీలన
తొలుత కాతేరు ప్రాంతాన్ని సందర్శించిన ప్రత్యేక అధికారి పుష్కరాల సమయంలో భక్తుల రాకపోకలు, వాహనాల నియంత్రణ, పార్కింగ్, రవాణా అనుసంధానంపై పరిశీలన చేశారు. నగరంలో ట్రాఫిక్ రద్దీని తగ్గించేందుకు ప్రత్యామ్నాయ మార్గాలు, ప్రత్యేక రవాణా సదుపాయాలు కల్పించే అంశాలను అధికారులతో చర్చించారు.
అనంతరం జాలరుపేట ప్రాంతంలో పర్యటించి పుష్కర ఘాట్లకు అనుసంధానమైన రహదారులు, పారిశుధ్యం, తాగునీరు, విద్యుత్ దీపాలు, మరుగుదొడ్లు, స్నానపు ప్రాంతాల అభివృద్ధిని పరిశీలించారు. భక్తుల రద్దీని క్రమబద్ధీకరించేందుకు ప్రత్యేక క్యూలైన్లు, ప్రవేశ, నిష్క్రమణ మార్గాలు ఏర్పాటు చేయాలని సూచించారు. మహిళలు, వృద్ధులు, దివ్యాంగులకు ప్రత్యేక సదుపాయాలు కల్పించాల్సిన అవసరాన్ని వివరించారు.
భక్తుల వసతికి ప్రత్యేక ప్రణాళిక
తదుపరి లూథర్ గిరి ప్రాంతాన్ని సందర్శించిన ఆయన తాత్కాలిక వసతి కేంద్రాలు, విశ్రాంతి ప్రదేశాలు, పార్కింగ్, రవాణా సదుపాయాలపై అధికారులతో చర్చించారు. కుటుంబ సమేతంగా వచ్చే యాత్రికులకు తాగునీరు, ఆహారం, వైద్య శిబిరాలు, అత్యవసర వైద్య సేవలు అందుబాటులో ఉండేలా ముందస్తు ప్రణాళికలు సిద్ధం చేయాలని సూచించారు.
రైల్వే స్టేషన్ నుంచి ఘాట్ల వరకు ప్రత్యేక రవాణా
గోదావరి రైల్వే స్టేషన్ ప్రాంతాన్ని కూడా ప్రత్యేక అధికారి పరిశీలించారు. రైళ్ల ద్వారా వచ్చే లక్షలాది మంది యాత్రికులు స్టేషన్ నుంచి పుష్కర ఘాట్లకు సులభంగా చేరుకునేలా రవాణా సదుపాయాలు కల్పించాల్సిన అవసరాన్ని వివరించారు.
రైల్వే, పోలీస్, మున్సిపల్, ఆర్టీసీ శాఖలు సమన్వయంతో పనిచేస్తూ ప్రత్యేక రవాణా ప్రణాళిక రూపొందించాలని సూచించారు. వాహనాల పార్కింగ్, మార్గదర్శక సూచిక బోర్డులు, ప్రత్యేక బస్సుల ఏర్పాటు వంటి అంశాలపై దృష్టి సారించాలని తెలిపారు.
పిండప్రదానాలకు ప్రత్యేక ప్రాంతాలు
గోదావరి పుష్కరాల సమయంలో పుణ్యస్నానాలతో పాటు పితృదేవతలకు పిండప్రదానాలు, తర్పణాలు నిర్వహించేందుకు పెద్ద సంఖ్యలో భక్తులు వచ్చే అవకాశం ఉందని ప్రత్యేక అధికారి పేర్కొన్నారు. ఈ నేపథ్యంలో పిండప్రదానాల కోసం ప్రత్యేక ప్రాంతాలను గుర్తించి అవసరమైన సదుపాయాలు కల్పించాలని సూచించారు.
నదిలోకి దిగే ప్రాంతాల్లో భద్రతకు అత్యంత ప్రాధాన్యత ఇవ్వాలని, గజ ఈతగాళ్లు, బోట్లు, అత్యవసర సహాయక బృందాలను అందుబాటులో ఉంచాలని అధికారులకు సూచించారు.
భద్రత, పారిశుధ్యానికి పెద్దపీట
పుష్కర ఘాట్ల వద్ద నిరంతర పారిశుధ్య నిర్వహణ, చెత్త సేకరణ, తాగునీటి సరఫరా, తాత్కాలిక మరుగుదొడ్లు, మహిళలకు ప్రత్యేక సదుపాయాలు ఏర్పాటు చేయాలని సమీక్షించారు. అదేవిధంగా సీసీ కెమెరాలు, పబ్లిక్ అడ్రస్ సిస్టమ్, విద్యుత్ దీపాలు, వైద్య శిబిరాలు, అంబులెన్సులు, ప్రథమ చికిత్స కేంద్రాలు ఏర్పాటు చేయాలని సూచించారు.
భారీ జనసందోహంలో తప్పిపోయే చిన్నారులు, వృద్ధులను వారి కుటుంబ సభ్యులతో కలిపేందుకు ప్రత్యేక సహాయక కేంద్రాలు, సమాచార కేంద్రాలు ఏర్పాటు చేయాల్సిన అవసరాన్ని అధికారుల దృష్టికి తీసుకెళ్లారు.




